बन्द कोहलपुर बजार । तस्वीर: केशव राना

हिन्दु राष्ट्रको माग गर्दै विभिन्न हिन्दुवादी संघसंगठनहरुले आज, २४ साउनमा गरेको बन्दका कारण बाँकेको जनजीवन प्रभावित भएको छ ।

शिव सेना नेपाल, आर्य समाज, राष्ट्रिय नागरिक संघर्ष समिति, विश्व हिन्दु युवा संघ, स्वधर्म संस्कृति संरक्षण अभियान लगायतका हिन्दुवादी संगठनहरुले बाँके बन्द गराएका हुन् ।

बन्दका कारण नेपालगञ्ज, कोहलपुरबाट छुट्ने लामो तथा छोटोदुरीका सवारीसाधन चल्न सकेका छैनन् ।

बजार, उद्योग, कलकारखाना, शैक्षिक संस्थाहरु पनि प्रभावित भएका छन् । बन्दकर्ताहरुले मोटरसाइकल समेत चल्न दिएका छैनन् ।

नेपालगञ्ज र कोहलपुरमा बन्दकर्ताहरुले पसलहरु बन्द गराउँदै हिँडेका छन् । बन्दमा हिन्दुवादीका साथसाथै राप्रपा नेपालका कार्यकर्ताहरुको समेत उपस्थिति छ ।

अहिलेसम्म कुनै अप्रिय घटना भने नघटेको जिल्ला प्रहरी कार्यालय बाँकेले जनाएको छ ।
केशव राना, बाँके

प्रतिकृया दिनुहोस