बन्दको विरोधमा विद्यार्थीलाई प्रदर्शन गर्न उक्साएको आरोप लगाउँदै नवलपरासीका शिक्षक नन्दप्रसाद महतोमाथि कुटपिट भएको छ ।

लगातारको बन्दले पढ्न पाउने अधिकार कुण्ठित भएको भन्दै नवलपरासीको त्रिभुवन बाल उच्च मावि, ढोकीका विद्यार्थीहरुले ३२ साउनमा प्रदर्शन गरेका थिए ।

“हाम्रो स्कुलका विद्यार्थीहरुले पठन पाठन सुचारु गर्न माग गर्दै सडकमा प्रदर्शन गरेपछि थारु भएर थारुकै आन्दोलनविरुद्ध विद्यार्थी उक्साउने भन्दै ममाथि कुटपिट भयो,” शिक्षक महतोले भने ।

थारु कल्याणकारिणी सभाका नवलपरासी अध्यक्ष गणेश महतो, राजकुमार महतो, मानसिंह चौधरी र डेमनारायण महतोले केही कुरा गर्नु छ भनी थारु संग्रहालयमा बोलाई कुटेको उनले बताए ।

“हामीले सडकमा प्रदर्शन गर भनेका होइनौं तर, पढन पाउने उनीहरुको अधिकार हो भन्दावित्तिकै ममाथि मुक्का हान्ने काम भयो,” उनले भने ।

मुक्का प्रहारबाट महतोको आँखा र टाउकोमा चोट लागेको छ । उनले आफूमाथि कुटपिट गर्नेलाई कारवाहीको माग समेत राखेका छन् ।

यसैबीच शिक्षक महतोमाथि भएको आक्रमणको बिरोधमा नेपाल राष्ट्रिय शिक्षक संगठनले विज्ञप्ति जारी गरी दोषीलाई कारवाही गर्न स्थानीय प्रशासनसँग माग गरेको छ ।

विद्रोही गिरी, नवलपरासी

प्रतिकृया दिनुहोस