तस्वीर: श्रवणकुमार देव

सप्तरीको भारदाहमा प्रहरीको गोली लागेर एकजनाको मृत्यु भएपछि सदरमुकाम राजविराज र रुपनी बजारमा तनाव बढेको छ ।

मधेशी मोर्चाले आह्वान गरेको बन्दका क्रममा भारदाहमा प्रहरी र आन्दोलनकारीबीच झडप हुँदा प्रहरीको गोलीबाट  राजीभ राउतको मृत्यु भएपछि भारदह वरपर अपराह्न ४ बजेदेखि कर्फ्यू लगाइएकाले शान्त देखिए पनि राजविराज र रुपनीमा आन्दोलन चर्केको हो ।

घटनालगत्तै मधेशी मोर्चाका कार्यकर्ताहरुले राजविराजमा विरोध प्रदर्शन गरिरहेका छन् ।
त्यसक्रममा उनीहरुले जिल्ला जनस्वास्थ्य कार्यालय सप्तरीको मोटरसाइकलमा आगजनी गरेका छन् ।

प्रदर्शनकारी र प्रहरीबीच जिल्ला प्रशासन कार्यालय अगाडि भएको झडपमा प्रहरीको लाठीबाट विद्यार्थी नेता शम्भु यादव घाइते भएका छन् ।

रुपनी बजारमा भएको प्रदर्शनमा सद्भावना पार्टीका दिनेश यादव, रामसपाका मुकेश कर्ण, तमलोपाका अरुण कुमार ठाकुर र मस्तकिम घाइते भएका छन् ।

घाइतेहरुको उपचार प्रहरीले आफ्नै नियन्त्रणमा गराएको मधेशी मोर्चा सप्तरीले जनाएको छ ।

भारदाह घटनामा गोली लागेर भारदह–१ का ४३ बर्षीय देवनारायण विश्वास, ४० वर्षीय सुरेन्द्र मण्डल, १४ वर्षीय दीपक साह, २० बर्षीय सत्यनारायण राउत, भारदह–२ का २० वर्षीय गोपालराज मण्डल र ४० वर्षीय विजय ठाकुर घाइते भएका छन् ।

घाइतेहरुमध्ये केहीलाई उपचारका लागि धरान र केहीलाई विराटनगर लगिएको छ ।

गोली प्रहार गर्नुअघि प्रहरीले लाठी प्रहार, दर्जनौं राउण्ड अश्रुग्यास र रबर गोली प्रहार गरेको थियो ।

प्रहरीको लाठीबाट संघीय समाजवादी फोरम नेपालका केन्द्रीय सदस्य शैलेन्द्र साह, जिल्ला अध्यक्ष दिनेश यादवसहित ६ जना घाइते भएका छन् ।

प्रहरीको गोलीबाट मृत्यु भएका राजीभ राउतको शव राजमार्गमा राखेर प्रदर्शन भइरहेपछि प्रहरीले हस्तक्षेप गर्दै धरान अस्पताल पुर्‍याएको छ । प्रहरीले उनी जिवितै रहेको हुनसक्ने भन्दै धरान पुर्‍याए पनि अस्पतालले उनलाई मृत घोषित गरेको छ ।

मृतकका आफन्तले राउतको शव बुझ्न मानेका छैनन् । उनीहरुले शव बुझ्न मोर्चाका नेताहरु अस्पताल आउनु पर्ने माग राखेका छन् ।
श्रवणकुमार देव, सप्तरी

प्रतिकृया दिनुहोस