सप्तरीका प्रजिअ वीरेन्द्रकुमार यादव

सप्तरीका प्रमुख जिल्ला अधिकारी वीरेन्द्रकुमार यादवले आन्दोलनकारीले भारदाह प्रहरी चौकी घेरेर गोली हान्न थालेपछि आत्मरक्षाका लागि प्रहरीले जवाफी फायरिङ गरेको बताएका छन् ।

“गोलीले प्वाल परेका इलाका प्रहरी कार्यालयका भित्ता नै प्रमाण छन, कार्यालयमा रहेको प्रहरी भ्यानमा पेट्रोल बम हानेर आगो लगाउन खोजियो, टायर सल्किसकेको थियो,” प्रजिअ यादवले हिमालखबरसँग भने ।

उनले थपे, “प्रहरीको सञ्चार सेट खोसियो, हतियार खोस्ने प्रयास हुँदैथियो, उताबाट गोली चलिरहेको थियो, त्यस्तो बेला प्रहरीले आत्मरक्षाका लागि गोली चलाउन परेको हो ।”

प्रहरीले गोली चलाउँदा एकजनाको मृत्यु भएको र केही घाइते भएको उनले जानकारी दिए । त्यस्तै नेपाल प्रहरीका तीन जना र सशस्त्र प्रहरीका चार जना पनि घाइते भएको उनले बताए ।

यादवका अनुसार घटना यसरी भयो
हिजो ३२ भदौ साँझ भारदाहमा सडक अवरोध गरेका संयुक्त लोकतान्त्रिक मधेशी मोर्चाका कार्यकर्ता र अवरोध हटाउन प्रयास गरिरहेको प्रहरीबीच झडप भएको थियो । त्यसक्रममा प्रहरीले लाठी चार्ज र अश्रुग्यास प्रहार गर्दा केही आन्दोलकारी घाइते भए भने प्रहरीको भ्यानमा पनि तोडफोड भयो ।

यद्यपी बन्दका आयोजक मधेशी मोर्चाका नेताहरुसँग प्रजिअ यादवले कुराकानी गरेपछि त्यो घटना साम्य भइसकेको थियो ।

त्यसैदिन साँझ करिब ६ बजे राजविराजस्थित पम्प हाउस (नहरबाट पानी पम्प गरेर सिँचाइ गर्नेसम्बन्धी) कार्यालयको कोठामा आगजनी भयो ।

आगजनीबारे आन्दोलनकारी स्थानीय नेतासँग कुरा गर्दा उनीहरुले आफ्नो आन्दोलनमा घुसपैठ भएको हुनसक्ने भन्दै त्यसबारे छानविन गर्ने र त्यस्ता घटना हुन नदिने र आन्दोलन शान्तिपूर्ण हुने बताएका थिए ।

आज १ भदौ विहान आन्दोलनकारीले भारदाहमा सडकमै पाल गाडेर त्यसभित्र ढुंगा लाठी थुपार्ने काम गर्दा प्रहरीले उक्त पाल हटाएको थियो ।

त्यसक्रममा प्रहरी र आन्दोलनकारीबीच झडप भयो । सडकमा रहेका आन्दोलनकारीलाई प्रहरीले तितरवितर पारिसकेको थियो तर केही क्षणमै आन्दोलनकारीले सडकमा गुडिरहेको सशस्त्र प्रहरीको भ्यानमाथि आक्रमण गरी तोडफोड गरे ।

प्रहरी र आन्दोलनकारीबीच झडप हुने र थामिने क्रम चलिरहँदा दिउँसो एक्कासी करिब ६०० को संख्यामा रहेको समूहले भारदहस्थित इलाका प्रहरी कार्यालय घेरा हारेर फायरिङ गर्न थाल्यो ।

आन्दोलकारीकातर्फबाट भएको फायरिङसँगै पेट्रोल बम प्रहार र ढुंगामुढा हुन थाल्यो । बाहिर रहेका प्रहरीका सञ्चारसेट समेत आन्दोलकारीले थुते । पेट्रोलबमले प्रहरी भ्यानको टायर समेत सल्किसकेको थियो ।

प्रहरीले आन्दोलनकारीलाई हटाउन र आत्मरक्षाका लागि गोली चलाउन पर्‍यो । त्यसक्रममा एकजना आन्दोलनकारीको मृत्यु हुनुका साथै केही घाइते भए ।

घुसपैठ भएको हुनसक्छ
प्रजिअ यादवले हिजो पम्पहाउसमा घुसपैठियाले आगजनी गरेको नेताहरुले नै स्वीकारेको अवस्थामा आज प्रहरी कार्यालयमाथि आक्रमण गर्ने वा आक्रमणका लागि उक्साउने पनि घुसपैठिया हुनसक्ने बताए ।

उनले आन्दोलनरत दलका जिल्ला नेताहरुलाई यसतर्फ सजग रहन र संयमित रही आन्दोलनका कार्यक्रम तय गर्न आग्रह गरेको बताए ।

भने,“ जिल्लाका सबै नेताहरुसँग कुरा गरिरहेको छु, उहाँहरु पनि घटनालाई कसरी साम्य पार्ने भन्ने बार छलफलमै हुनुहुन्छ, यस्ता घटना बढन नदिन आफूहरु सचेत रहेको बताउनु भएको छ ।”

अहिले पनि विभिन्न किसिमका अफवाह फैलाएर आन्दोलनकारीलाई उत्तेजित बनाउने काम भइरहेको भन्दै उनले सञ्चारमाध्यमलाई पनि संयमित रहन र शान्ति सुृव्यवस्था कायम गर्नका लागि सहयोग गर्न आग्रह गरे ।

प्रतिकृया दिनुहोस