अखिल नेपाल फुटबल संघले आयोजना गरेको १९ वर्ष मुनिको साफ च्याम्पियनसीप फुटबल प्रतियोगितामा समूह विजेताका लागि नेपाल ७ भदौमा बङ्गलादेशसँग भिड्दैछ ।

ललितपुरको सातदोबाटोस्थित एन्फा कम्प्लेक्सको फुटबल खेल मैदानमा दिउँसो ३ः३० बजेदेखि नेपालले बङ्गलादेशको सामना गर्नेछ । जारी प्रतियोगितामा नेपाल एक खेल अगावै सेमिफाइनलमा प्रवेश गरिसकेको छ ।

५ भदौमा भएको खेलमा बङ्गलादेशले भुटानलाई २–० ले गोलअन्तरले पराजित गरेपछि नेपाल सेमिफाइनलमा प्रवेश गरेको हो ।

त्यस्तै, भुटान भने लगातार दोस्रो हार व्यहोर्दै प्रतियोगिताबाट बाहिरिएको छ । पहिलो खेलमा भुटान नेपालसँग १–३ गोलअन्तरले पराजित भएको थियो । जारी प्रतियोगितामा नेपाल र बङ्गलादेशले समान ३/३ अङ्क जोडेका छन् । दुवै टोली समूह विजेताका लागि भिड्नेछन् ।

सार्कका छ देशले भाग लिएको उक्त प्रतियोगिताको समूह ‘ए’ मा नेपालसहित बङ्गलादेश र भुटान छन् । त्यसैगरी समूह ‘बी’ मा माल्दिभ्स, भारत र अफगानिस्तान परेका छन् ।

प्रतिकृया दिनुहोस