पूर्वपश्चिम राजमार्गअन्तर्गत बुटवल– नारायणगढ सडक खण्डमा आजदेखि यातायात सञ्चालनमा आएको छ ।

पश्चिमाञ्चल क्षेत्रीय ट्राफिक प्रहरी कार्यालय बुटवलका प्रमुख हरिराज वाग्लेका अनुसार बुटवल भएर पूर्व र उत्तरतर्फ जाने सवारी साधन सञ्चालनमा आएका हुन् ।

लामो समयको बन्दपछि ८ भदौदेखि सवारी साधन सञ्चालनमा आएको हो । पश्चिमाञ्चल बस व्यवसायी समितिले नगर र बुटवलबाट नारायणघाट, काठमाडौँ जाने सवारी सञ्चालनमा आएको जनाएको छ ।

यातायात सञ्चालनसँगै पसल र विद्यालय खुल्न थालेका छन् । कावासोती, बर्दघाट, सुनवललगायतका बजार खुलेका छन् तर सदरमुकाम परासीको बजार खुल्न सकेको छैन ।

केही मधेशकेन्द्रित दल र थरुहट संघर्ष समितिलगायतको आह्वानमा भएको बन्दका कारण परासी बजार खुल्न नसेकेको हो ।

अन्यत्र यातायात र पसल खुल्न थालेकाले जनजीवन सामान्य बन्दै गएको छ ।
“भैरहवा, चन्द्रौटासम्म सवारी साधन निर्वाध चलेका छन्,” वाग्लेले भने, “बन्दपछिको अवस्था सामान्य बन्दै गएको छ ।”

स्थानीय प्रशासनले परासी क्षेत्रलाई ७ भदौ बेलुकीदेखि सात दिनका लागि निषेधित क्षेत्र घोषणा गरिसकेको छ ।

विद्रोही गिरी, नवलपरासी

प्रतिकृया दिनुहोस