विराटनगरको महेन्द्रचोक नजिक बम विष्फोट हुँदा दुई जना घाइते भएका छन् ।

महेन्द्र चोकमा रहेको एस लाल पेट्रोल पम्पमा पेट्रोल भरिरहेकाको लाइनमाथि फालिएको बमको छर्रा लागेर स्थानीय निरज शाह र  अजय पाण्डे  घाइते भएका छन् ।

शाहको दाहिने पाखुरामा बमको छर्रा लागेको छ । उनको कोशी अञ्चल अस्पतालमा उपचार भइरहेको छ । त्यसैगरी पाण्डेको  पिठयुँमा छर्रा लागेको छ ।

“पेट्रोल भर्नेको लामै लाइन थियो, एक्कासी ठूलो आवाजसहित धुवाँको मुस्लो आयो, एकजनालाई कोशी अस्पताल र अर्का एकजनालाई सहकारी अस्पताल लगिएको छ,”  प्रत्यक्षदर्शी सौरभ ढकालले जानकारी दिए ।

“सामान्य पटाका जस्तै बम तर्साउनका लागि पड्काएको हुनुपर्छ, क्षति भएको छैन,” प्रमुख जिल्ला अधिकारी गणेशराज कार्कीले भने ।

घटनालगत्तै प्रहरी नायब उपरीक्षक प्रमोद खरेलले पनि सामान्य घरेलु बम पड्किएको बताएका थिए । प्रहरीले घटनाबारे थप अनुसन्धान भइरहेको जनाएको छ ।

कमल रिमाल, बिरटानगर

प्रतिकृया दिनुहोस