संघीय लिम्बुवान पार्टी नेपालका कार्यकर्ताले पत्रकार कृष्ण हुमागाईंलाई कुटपिट गरी घाइते बनाएका छन् ।

समाचार संकलनका लागि मोटरसाइकलमा निक्लेका हुमागाईंलाई लिम्बुवानका कार्यकर्ताले १५ भदौ दिँउसो २ बजे बन्दको अवज्ञा गरेको भन्दै बिर्तामोडमा कुटपिट गर्नुका साथै उनी चढेको मोटरसाइकल पनि तोडफोड गरेका छन् ।

घाइते हुमागाईंको बिर्तामोडस्थित बि एण्ड सी अस्पतालमा उपचार भइरहेको छ । उनको टाउको, हात र ढाडमा चोट लागेको छ ।

नेपाल पत्रकार महासंघ झापाका अध्यक्ष भीम नेम्बाङ्गले पत्रकारको परिचयपत्र देखाँउदा देखाँउदै हुमागाँईमाथि आक्रमण भएको बताएका छन् । हुमागाईं नेपाल पत्रकार महासङ्घ झापाका पूर्वसभापति एवम् नेपाल प्रेस युनियनका जिल्ला अध्यक्ष समेत हुन् ।

नेम्बाङ्गले बिज्ञप्ती जारी गर्दै दोषीलाई पक्राउ गरि कारबाही गर्न सरकारसँग माग गरेका छन् ।

विज्ञप्तिमा लिम्बुवान प्रदर्शनकारीले पत्रकारमाथि गरेको आक्रमण स्वतन्त्र प्रेसबिरोधी कार्य भएको उल्लेख छ ।

लिम्बुवानले आव्हान गरेको दुईदिने बन्दको दोस्रोदिन झापाको जनजीवन कष्टकर प्रभावित भएको छ । विद्यालय, बजार र कलकारखाना बन्द छन् ।
गोपाल गडतौला, झापा

प्रतिकृया दिनुहोस