प्रहरीले चलाएको गोलीको छर्राले लागेर वीरगञ्जमा एक जना घाइते भएका छन् ।

वीरगञ्ज मालपोत कार्यालय नजिकै घरकाे अाँगनमा  बसिरहेका कर्णको खुट्टामा छर्रा लागेको हाे । उनको नारायणी उपक्षेत्रीय अस्पतालमा उपचार भइरहेको छ ।

छपकैयामा टायर बालेर प्रदर्शन गर्न थालेका प्रदर्शनकारीलाई  हटाउन प्रहरीले हानेको रबर गोलीको छर्रा लागेर उनी घाईते भएको प्रहरीले जनाएको छ ।

दङ्गाग्रस्त क्षेत्र घोषणा गरेपछि प्रशासनले वीरगञ्जमा घर बाहिर निस्कन समेत रोक लगाएको छ ।

यसैबीच, सुरक्षा संवेदनशीलताको कारण देखाउँदै बारामा १० वटा प्रहरी चौकी तथा अस्थाई पोष्टलाई स्थान्तरण गरिएको छ ।

६/७ जना प्रहरी रहने चौकी तथा अस्थाई पोष्टलाई तत्कालका लागि हटाइएको हो ।

बाराको कचोर्वा, महेन्द्र आदर्श च्युटाहा, बरियारपुर, गण्डक, दक्षिण झिटकैया, पिपरपाती, लङ्गढा चोक लगायतका १० वटा प्रहरी चौकीलाई ईप्रका सिम्रौनगढ, ईप्रका कवहीगोठ र नजिकको सशस्त्र प्रहरीको बेस क्याम्पमा राखिएको छ ।

-सुरेश बिडारी, वीरगञ्ज

प्रतिकृया दिनुहोस