सवै तस्वीर: सुरेश विडारी

अनिश्चितकालिन मधेश बन्दका कारण १९ दिन बन्द रहेको वीरगञ्ज बजार १७ भदौमा दुई घण्टा खुलेको छ ।

मधेशी मोर्चाको लगातारको बन्दका बीच चार दिनदेखि जारी कर्फ्यूले उकुसमुकुस भएका वीरगञ्जबासीले साँझ दुई घण्टा मात्रै कर्फ्यू हटाइँदा पनि धेरै राहत महशुस गरे ।

कर्फ्यू हटेलगत्तै बजारका पसलहरु खुले, दैनिक उपभोग्य र जरुरी सामान खरिदका लागि वीरगञ्जबासीको भीड बजारमा देखियो ।

दुई घण्टासम्म वीरगन्जको घण्टाघर, माइस्थान, आदर्शनगर, घडीअर्वा, मुरली, रानीघाट, वीर्ता, छपकैया लगायतका स्थानमा बजार तथा पसलहरु खुले भने पसलहरुमा दैनिक उपभोग्यका सामन किन्नेहरुको भिडभाड देखियो ।

सडकमा विना अवरोध मोटरइकल, रिक्सा, ठेला चले ।

लामो समयको बन्दले घरायसी समान समेत नभएको अवस्थामा दुई घण्टा बजार खुल्दा राहत मिलेको माईस्थानका मनोज गुप्ताले बताए ।

“बन्द र कर्फ्यूले घर नै जेल भएको थियो दुई घण्टाले मात्रै पनि केही राहत मिल्दो रहेछ ।”

लामो समयको बन्दमा किनमेल गर्न नपाउँदा कसैले घरमा नुन सकिएको त कसैकोमा चामल सकिएको बताए ।

बन्दले सबैलाई कष्ट मात्रै हुने भएकोले सरकारले तराईको समस्या तत्काल वार्ता मार्फत समाधान गरेर कफ्र्यु हटाउनुपर्ने माग गुप्ताले गरे ।

धेरै दिनपछि व्यापार गर्न पाएकोमा ठेलामा तरकारी बेच्दै हिडेका वीरेन्द्रप्रसाद पनि खुसी देखिन्थे ।

बन्दले व्यापार व्यवसाय ठप्प भएकोमा दुईघटा मात्रै खुलेपनि केहि राहत भएको उनले बताए ।

कम्तीमा दैनिक चार घण्टा बजार खुलाउन उनले संबन्धित पक्षसँग माग गरे । “जम्मा दुई घण्टा बजार खुल्यो, आउन जानमै सकिन्छ समान कतिखेर बेच्ने, कम्तीमा चार घण्टा खुलाउँदा हुन्थ्यो ।” वीरेन्द्रप्रसादले भने ।

सामानको भाउ आकासिएको भए पनि ग्राहकले मोलतोल नगरी आफूले भनेकै भाउमा किनेको उनले जानकारी दिए ।

कफ्र्यू खुलेपछि सीमावर्ती भारतीय बजार रक्सौलमा अलपत्र परेका नेपालीहरु केही रिक्सामा त केही पैदलै हतारहतार नेपालतर्फ आए ।

????????????????????????????????????

जिल्ला सुरक्षा समितिको १७ भदौ दिउँसो बसेको बैठकले साँँझ ५ बजेदेखि सात बजे सम्म दुई घण्टाका लागि मात्रै कफ्र्यू फिर्ता लिने निर्णय गरेको थियो ।

बन्द र कर्फ्यूले सर्वसाधरणको जीवन कष्टकर भएकोले केही राहत होस भनेर सुरक्षा संवेदनशीलतालाई ध्यानमा राख्दै दुई घण्टा मात्रै कफ्र्यु फिर्ता लिइएको जिल्ला प्रशासन कार्यालय पर्साका प्रशासकीय अधिकृत विनय श्रीवास्तवले बताए ।

वीरगञ्जमा सोमबार र मङ्गलबार प्रहरी र प्रर्दशनकारीबीच ठाँउ ठाउँमा भएको झडपमा ५ जनाको मृत्यु भएको थियो ।
सुरेश बिडारी, वीरगञ्ज

प्रतिकृया दिनुहोस