थप समाचारशनिबार, भाद्र १९, २०७२

लमजुङको शान्ति उमाविमा आगलागी, सवा करोडको क्षति

हिमालखबर

shantiलमजुङको सुन्दरबजार–१३ कुन्छास्थित शान्ति उमाविमा गए राति आगलागी भएको छ ।

आगलागीबाट विद्यालयको महत्वपूर्ण कागजातसहित रु. एक करोड २५ लाख भन्दा बढीको क्षति भएको प्रहरीले प्रारम्भिक अनुमान गरेको छ ।

आगलागीबाट विद्यालयको पुस्तकालयमा रहेका तीन हजार भन्दा बढी पुस्तक जलेर नष्ट भएका छन् भने स्टोर कोठामा राखिएका २०२३ सालदेखिका महत्वपूर्ण कागजपत्रहरु पनि जलेका छन् ।

आगलागी र तोडफोडबाट विद्यालयको प्रयोगशालामा रहेका सामाग्रीहरु, २० थान कम्प्युटर, फोटोकपी मेसिन, विद्यालयको दानदाताको नाम सहितको ताम्रपत्र र तस्वीरहरु समेत नष्ट भएका छन् ।

कक्षाकोठा, पुस्तकालय, कप्युटर कोठा, ल्याब र स्टोर कोठाका गरी ३०० वटा कुर्सी समेत जलेको विद्यालयका शिक्षकहरुले बताए ।

विद्यालयको दक्षिणपश्चिम तर्फको कक्षाकोठाको झ्याल फोडेर आगलागीमा संलग्न व्यक्ति भित्र छिरेको र कप्युटर कोठा, पुस्तकालय लगायतका कोठाहरु फोरेर आगलागी गरेको प्रारम्भिक अनुसन्धानमा देखिएको प्रहरीले जनाएको छ ।

गएराति साढे १२ बजे विद्यालयको भान्साकोठामा राखिएको ग्याँसको सिलिन्डर पड्किएपछि मात्र विद्यालयमा आगलागी भएको स्थानियबासीले थाहा पाएको विद्यालयका शिक्षक निलकण्ठ अधिकारीले बताए ।

घटनाको जानकारी पाएलगत्तै ईलाका प्रहरी कार्यालय भोटेवडारबाट प्रहरी टोली खटिएर घटनाको अनुसन्धान गरिरहेको छ ।

विक्रम संवत २००९ सालमा स्थापना भई २०१७ सालबाट पूर्ण रुपमा सञ्चालनमा आएको शान्ति उमाविमा करिब ५०० विद्यार्थी अध्ययनरत छन् ।
युवराज श्रेष्ठ, लमजुङ

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...