संविधानसभाको चौथो ठूलो दल राप्रपा नेपाल पनि संविधान निर्माण प्रक्रियाबाट अलग हुने भएको छ ।

पार्टीको केन्द्रीय कार्य सम्पादन समितिको बैठकले संविधान निर्माणको बाँकी प्रक्रियाबाट अलग हुने निर्णय गरेको अध्यक्ष कमल थापाले बताएका छन् ।

कुल २५ जना सभासद रहेको राप्रपा नेपालसहित संविधान निर्माण प्रक्रियाबाट अलग हुने सभासदको संख्या ८१ पुगेको छ ।

यसअघि २२ भदौमा संविधानसभा बैठकमा थापाले तीन ठूला दलले संविधान निर्माण प्रक्रियामा राप्रपा नेपाललाई निषेध गरेको भन्दै आफू संविधान निर्माण प्रक्रियाबाट बाहिरिन सक्ने बताएका थिए ।

संविधानसभामा बोल्न ७ मिनेटको समय पाएका थापाले एक मिनेटमा आफ्नो भनाई टुंग्याउँदै आफू औपचारिकता पूरा गर्न मात्रै बोलेको बताएका थिए ।

बैठकपछि संविधानसभा अध्यक्ष सुवासचन्द्र नेम्वाङले उनलाई आफ्नो कार्यकक्षमा बोलाएर प्रक्रियाबाट बाहिरिन नहुने आग्रह गरेका थिए भने उनको एमाओवादी अध्यक्ष पुष्पकमल दाहालसँग पनि छलफल भएको थियो ।

प्रतिकृया दिनुहोस