ट्राफिक प्रहरी कार्यालयका सामान सडकमा ल्याएर आगो लगाउँदै । तस्वीर: दीलिप सिंह

स्थानीय प्रशासनले सिरहाको लहानलाई निषेधित क्षेत्र घोषणा गर्दा पनि विरोध प्रदर्शन नरोकिएपछि दंगा ग्रस्त क्षेत्र घोषणा गरेको छ ।

जिल्ला प्रशासन कार्यालयले निषेधित क्षेत्र घोषणा गरेकै बेला प्रदर्शनकारीहरुले लहानमा रोकी राखिएको ना ५ ख ४१९४ नम्बरको ट्र«कमा आगजनी गरेका थिए । त्यसक्रममा प्रदर्शनकारीलाई तितरवितर पार्न प्रहरीले ६ राउण्ड हवाई फायर समेत गरेको छ ।

त्यस्तै विहान ९ बजे प्रदर्शनकारीले जिल्ला ट्राफिक प्रहरी कार्यालय लहानमा आगजनी गरेका छन् । उनीहरुले कार्यालयका कागजात, मोटरसाइकल, साइकल र फर्निचर सडकमा ल्याएर समेत जलाएका छन् ।

स्थिति नियन्त्रणभन्दा बाहिर जान थालेपछि जिल्ला प्रशासन कार्यालयले पूर्वपश्चिम राजमार्ग अन्तर्गत सिरहाको पूर्वमा बलान नदीदेखि पश्चिममा कमला नदीसम्मको करिब ५० किलोमिटर र नयाँ चोहर्वादेखि सदरमुकाम जोड्ने सडकको दायाँबायाँ ५ सय मिटर क्षेत्रलाई दंगाग्रस्त क्षेत्र घोषणा गरिएको हो ।

दंगाग्रस्त क्षेत्र घोषणा गरिएपछि उक्त क्षेत्रमा सभा जुलुश गर्न नपाइने, ५ जनाभन्दा बढी समूहमा भेला हुन, घुम्न नपाइने प्रमुख जिल्ला अधिकारी डा. मानबहादुर विकले बताए ।

आन्दोलनकारीले विहानै लहान, मिर्चैया, गोलबजारको ठाउँ ठाउँमा टायर बालेर प्रदर्शन गरेका थिए भने विभिन्न ठाउँमा रुख ढालेर सडक अवरुद्ध पारेका छन् ।
दिलिप कुमार सिंह, सिरहा

प्रतिकृया दिनुहोस