संविधानसभाबाट बन्ने संविधानलाई अन्तर्राष्ट्रिय जगतले पनि समर्थन गर्नुपर्ने प्रमुख दलका शीर्ष नेताहरुले बताएका छन् ।

नयाँ संविधानको अन्तिम परिमार्जित विधेयकमाथि सम्बोधन गर्दै नेताहरुले ऐतिहासिक आन्दोलनहरुले प्राप्त गरेको परिवर्तन संस्थागत गर्ने संविधान बनेको दावी गरे ।

नेपाली कांग्रेसका सभापति एवम् प्रधानमन्त्री सुशील कोइरालाले विभिन्न पार्टीको सहभागिता रहेको संविधानसभाले बनाएको संविधान सबैका साझा दस्तावेज भएको बताए । उनले भने, “सार्वभौम देशको संविधानसभाले बनाएको संविधानलाई सवैले समर्थन गर्नुपर्छ ।”

प्रधानमन्त्री कोइरालाले मित्र राष्ट्रहरुले संविधानसभाबाट बन्ने संविधान स्वीकार्ने बताएको उल्लेख गरे ।

नेकपा एमालेका अध्यक्ष केपी शर्मा ओलीले गणतन्त्र, संघीयता र समानुपातिक/समावेशी सिद्धान्तलाई स्वीकार गर्ने संविधानलाई वैधानिकता दिनुपर्ने बताए । उनले भने, “यो ऐतिहासिक परिवर्तनलाई मित्र राष्ट्रहरुले पनि सकारात्मक रुपमा लिनुपर्छ ।”

एमाओवादीका अध्यक्ष पुष्पकमल दाहालले जनताको ऐतिहासिक संघर्षबाट प्राप्त उपलब्धी संस्थागत गर्न संविधानसभाबाट संविधान ल्याउनुपर्ने बताए । उनले भने, “भारत, चीन, अमेरिकामा संविधान बन्दै गर्दाको अवस्थामा के भएको थियो ?”

दाहालले सार्वभौम नेपाली जनताको प्रतिनीधित्व गर्ने संविधानसभा आफ्नो निर्णय गर्न सक्षम रहेको बताए । उनले भने, “नेपालको निर्णय नेपाली नेताहरुले गर्न सक्दैनन् भन्ने देखाउन खोजिएको छ, यसबाट हामी सचेत छौं ।”

दफावार छलफलको अन्तिम छलफलमा संविधान मस्यौदा समितिका सभापति कृष्णप्रसाद सिटौलाले स्वतन्त्र, जनताको सार्वभौमिकता र अखण्डता बाहेक अरु विषय परिवर्तनीय भएकाले संविधान निर्माणमा अवरोध नजाउन आग्रह गरे । उनले भने, “संविधान देशको गतिलाई बोक्ने प्रकृतिको छ, यसलाई संशोधन गर्न सकिन्छ । आन्दोलनरत पक्ष वार्तामा आउनुपर्छ ।”

प्रतिकृया दिनुहोस