संयुक्त लोकतान्त्रिक मधेशी मोर्चाका कार्यकर्ताहरुले कपिलवस्तुका दुई वटा प्रहरी चौकीमा आगो लगाएका छन् ।

उनीहरुले २९ भदौ राति लबनी र विजुवाका अस्थायी प्रहरी चौकीमा आगजनी गरेका हुन् ।

लवनी गाविस स्थित अस्थायी प्रहरी चौकीमा ठूलो संख्यामा आएका प्रदर्शनकारीले आगजनी गरेपछि अस्थायी प्रहरी चौकी र त्यहाँ रहेका मोटरसाइकलसहित सामानहरु ध्वस्त भएको प्रहरी उपरीक्षक विक्रम गुरुङले बताए ।

त्यस्तै उनीहरुले चौकीमा रहेको ग्यास सिलिण्डर, ग्यास चुल्हो लगायतका सामानहरु भने लुटेर लगेको प्रहरीले जनाएको छ ।

रुपन्देहीको वेथरीमा मोर्चाको कार्यकर्ता माथि भएको गोली प्रहारको विरोध स्वरुप आगजनी गरिएको मोर्चाका एक नेताले बताए ।

अस्थायी प्रहरी चौकीमा प्रहरी सहायक निरिक्षकको कमाण्डमा १० जनाको प्रहरीको टोली थियो ।

चौकीमा आगजनी भएपछि सो टोलीलाई नजिकैको ईलाका प्रहरी कार्यालय पकडीमा सारिएको जिल्ला प्रहरी कार्यालयले जनाएको छ ।

यसै गरी आगलागीबाट बिजुवा प्रहरी चौकीका सबै सामान जलेर नष्ट भएको छ । आगजनीबाट सँगै रहेको गाविस कार्यालयमा पनि क्षति पुगेको प्रहरीले जनाएको छ ।

आगजनीपछि विजुवा प्रहरी चौकीका ८ जना प्रहरीलाई सीमा प्रहरी चौकी चाकरचौडामा लगिएको प्रहरी उपरीक्षक गुरुङले बताए ।
गोपाल भण्डारी, कपिलवस्तु

प्रतिकृया दिनुहोस