संविधान पारित गर्दै सभासदहरु । तस्वीरः विक्रम राई

संविधानसभाको बैठकले नेपालको संविधान–२०७२ लाई दुई तिहाई भन्दा बढी मतले पारित गरेको छ ।

नेपालको  संविधानको परिमार्जित विधेयक–२०७२ का पक्षमा ५०७ मत र विपक्षमा २५ मत परेको छ । संविधानसभामा तत्काल कायम रहेको संख्या ५९८ काे दुई तिहाई अर्थात ३९९ मतले मात्रै पनि संविधान पारित हुनसक्थ्यो । अहिले संविधानका पक्षमा खसेको मत ८४.७८ प्रतिशत हो ।

राप्रपा नेपालले संविधानको विपक्षमा मतदान गरेको छ भने केही मधेश केन्द्रित दलहरु संविधान निर्माण प्रक्रियाबाटै अलग भएकाले बैठकमा सहभागी भएनन् ।

यसरी पारित भएको संविधानका धाराहरुलाई संवैधानिक राजनीतिक संवाद तथा सहमति समितिका सभापति बाबुराम भट्टराई पदेन अध्यक्ष रहने आनुसंगिक समितिले क्रम र भाषिक शुद्धता मिलाउने काम गर्नेछ।

समितिले अन्तिम रुप दिएपछि नेपालको संविधान– २०७२ पाँच प्रति नेपाली कागजमा छापिनेछ ।

उक्त प्रकाशित पाँच प्रति संविधानमा १ असोज शुक्रबारमा विहान ९ देखि दिउँसो ३ बजेसम्म सभासदहरुले संविधानसभाको ल्होत्से हलमा पुगी हस्ताक्षर गर्नेछन् । त्यसपछि संविधानलाई सभा अध्यक्षले प्रमाणिकरण गर्नेछन् ।

अब संविधानसभाको बैठक ३ असोज साँझ ५ बजे बस्ने छ । उक्त बैठक विशेष समारोहमा परिणत हुनेछ भने त्यसै समारोहमा राष्ट्रपति रामवरण यादवले नेपालको संविधान–२०७२ लागू भएको घोषणा गर्नेछन् ।

प्रतिकृया दिनुहोस