प्रधानमन्त्री एवम् नेपाली कांग्रेसका सभापति सुशील कोइरालाले मुलुकले ठूलो सफलता प्राप्त गरेकाले जिल्लाजिल्लामा दीपावली मनाउन आग्रह गरेका छन् ।

संविधानसभाबाट नयाँ संविधान पारित भएपछि बाहिरिने क्रममा प्रधानमन्त्री कोइरालाले ७० वर्ष लामो नेपाली जनताको सपना पूरा भएको बताए । उनले भने, “यो सवै जनताको सफलता हो ।”

नेकपा एमालेका अध्यक्ष केपी शर्मा ओलीले जनताका प्रतिनीधिले बनाएको संविधान जारी हुनु देशका लागि खुशीको खबर भएको बताए । उनले अहिले देश नै खूशी भएको बताए । एमालेका अर्का नेता झलनाथ खनालले आफ्नो जीवनकै खूशीको दिन भएको बताए । उनले भने, “यो ऐतिहासिक गौरवको दिन हो । अव मुलुक आर्थिकतिर लाग्नेछ ।”

एमाओवादीका अध्यक्ष पुष्पकमल दाहालले संविधानसभाले क्रान्तिकारी परिवर्तनको सपना पूरा गरेको बताए । दाहालले संविधानसभाको अत्याधिक बहुमतबाट संविधान जारी गरेर हजारौं शहीदहरुको सम्मान भएको बताए ।

उनले आन्दोलनरत दलहरुलाई वार्ता र सम्वादमा बस्न आग्रह गरे । दाहालले भने, “धर्मशास्त्र जस्तो नभई गतिशील संविधान बनेको छ । संविधान संशोधन गरेर असन्तुष्टको माग पूरा हुन्छ ।”

प्रतिकृया दिनुहोस