फाइल तस्वीर: द रोयल करेस्पोन्डेन्टबाट साभार

डेनमार्कका राजकुमार फ्रेडरिक चार दिने भ्रमणका लागि आज, ३१ भदौमा लमजुङ आईपुगेका छन् ।

डेनिस रेडक्रसको निमन्त्रणामा लमजुङ आएका राजकुमार फ्रेडरिकले डेनिस रेडक्रसको सहयोगमा लमजुङमा चलेको परियोजना र भूकम्प पीडितको अवस्था अवलोकन गर्ने कार्यक्रम छ ।

डेनमार्कको सहयोगमा संकटासन्नता परियोजना संचालित भइरहेका पाचोक, फलेनी, ढोडेनी, बन्सार, नौथर र हिलेटक्सार गाविसमा भूकम्पपछि डेनिस रेडक्रसको सहयोगमा राहत तथा पुनस्र्थापनाका कार्यक्रम सञ्चालन भएका थिए ।

राजकुमार फ्रेडरिकको साथमा अन्तर्राष्ट्रिय रेडक्रसका प्रतिनिधि, पराराष्ट्र मन्त्रालय र डेनिस राजदुतावासका कर्मचारी सहभागी छन् ।

डेनमार्कको राजधानी कोपनहेगनबाट आजै काठमाडौं उत्रिएका राजकुमार काठमाडौंबाट भने स्थलमार्ग हुँदै लमजुङ सदरमुकाम बेसीशहर आईपुगेका हुन् । उनी आइतबार ३ असोजमा बेसीशहरबाट काठमाडौँ हुँदै डेनमार्क प्रस्थान गर्नेछन् ।

विशुद्ध निजी भनिएको लमजुङ भ्रमणका क्रममा उनी भोली, १ असोजमा पाचोक गाविस पुग्नेछन् । त्यहाँ भूकम्प पीडितको अवस्था र राहत वितरणको प्रभावकारिता अवलोकन गरेर सोही गाउँमा बास बस्ने नेपाल रेडक्रस सोसाईटी लमजुङका अध्यक्ष नारायणप्रसाद घिमिरेले बताए ।

त्यसपछि शनिबार, २ भदौमा पाचोकबाट पैदलयात्रा गरी बन्सार गाविस हुँदै सदरमुकाम बेसीशहर फर्कने कार्यक्रम रहेको छ ।

भ्रमणका क्रममा कुनै राजनीतिक भेटघाट नहुने समेत बताईएको छ ।

डेनिस रेडक्रसको सहयोगमा लमजुङका ६ गाविसका एक हजार ८ सय घरधुरी भूकम्प पीडितहरुलाई जस्तापाता, घर निर्माण सामाग्री, भाडाकुडा, खाद्यन्न, लत्ताकपडा लगायतका सामाग्री वितरण गरिएको छ ।

पीडितलाई प्रति परिवार ४५ हजार रुपैयाँ बराबरको सहयोग गरी ४ करोड रुपैँया खर्च गरिएको रेडक्रस लमजुङका अध्यक्ष घिमिरेले जानकारी दिए ।
युवराज श्रेष्ठ, लमजुङ

प्रतिकृया दिनुहोस