बिक्री नभएका मूर्ति नष्ट गर्दै नन्दलाल पण्डित (बीचमा) र सहयोगीहरु । तस्वीरः सुरेश विडारी

रु. ४० हजार खर्च गरेर विश्वकर्मा बाबाका ५० वटा मूर्ति बनाएका वीरगञ्ज नगवाका नन्दलाल पण्डित १ असोज बिहान धमाधम मूर्ति तोड्दै गरेका भेटिए ।

“४० हजार खर्च गरेर ५० वटा मूर्ति बनाएँ । १५ वटा मात्रै बिक्री भए, बाँकी कहाँ राख्ने ?” उनले गुनासो गरे ।

वीरगञ्जमा लामो समयदेखि जारी आमहडताल र कर्फ्यूले गर्दा यसपटक विश्वकर्मा पूजाको धुमधाम छैन ।

विशेष गरी यातायात व्यवसायी र उद्योगीले धुमधामका साथ विश्वकर्मा पूजा मनाउने गरे पनि एक महिनाअघि देखि नै यातायात ठप्प भएपछि न त व्यवसायीमा उत्साह छ न त वातावारण नै । उद्योगहरु पनि बन्द छन् । मजदुरहरु बेरोजगार भएका छन् ।

पण्डितले मूर्ति बनाउनका लागि वीरगञ्जको मुर्लीमा भाडामा लिएको जग्गाको म्याद आजसम्म मात्रै हो । अब जग्गा खाली गर्नुपर्छ ठूलाठूला मूर्ति अर्को वर्षसम्म राख्न लागत भन्दा भण्डारण भाडा बढी पर्छ । त्यसैले उनले मूर्ति तोडेर विसर्जन गरेका हुन् ।

“यही मूर्ति बिक्री भएको भए अहिले कतै यसको पूजा भैरहेको हुन्थ्यो, यसरी मूर्ति भत्काउँदा दिक्क लागेको छ,” पण्डितले भने ।

वीरगञ्जका अधिकांश कालीगढको अवस्था पण्डितको जस्तै छ । लगानी र मेहनत खेर गएको भन्दै उनीहरु चिन्तित छन् ।

आफैंले बनाएको मूर्तिसँगै हरिसिद्धिका कालिगढ कुनदेव पण्डित । तस्वीरः सुरेश विडारी

गत वर्ष १५० वटा मूर्ति बिक्री गरेका लङ्गडीका नरेश बैठाले यसवर्ष २५ वटा मूर्ति बनाए पनि १० वटा मात्रै बेचियो । उनले यसवर्ष बारा पर्सा औद्योगिक करिडोरबाट मूर्तिको माग नभएको सुनाए ।

माटो, पराल, बाँस लगायत सामाग्रीको प्रयोग गरी बनाइने एउटा मूर्ति तयार पार्न कालिगढहरु रु १ हजारसम्म खर्च गर्छन् ।

तराईमा सरस्वती पूजा, विश्वकर्मा पूजा र दशैंका बेला कालीगढका मूर्ति विक्री हुन्छन् ।

वीरगञ्ज, कलैया, परवानीपुर, जितपुर लगायत बजारमा नेपालका मात्रै नभएर भारतका कालीगढहरु समेत आएर मूर्ति बनाएर बेच्ने गर्दछन् ।

वीरगञ्ज नेशनल ट्रेडिङ चोकमा ग्राहक कुरेर बसेका भारत हरिशिद्धिका कुनदेव पण्डित यसपाला आफ्नो मेहनत र लगानी खेर गएको बताउँछन् ।

“दुई महिना लगाएर ४० वटा मूर्ति बनाएँ, २० वटा बिक्री भए अरु त्यसै छन् ,” उनले भने ।

सुरेश विडारी, वीरगञ्ज

प्रतिकृया दिनुहोस