सरकारले तराई मधेशका विभिन्न भागमा पछिल्लो समय भएका आन्दोलनका क्रममा ज्यान गुमाउनेका परिवारलाई जनही रु १० लाख प्रदान गर्ने निर्णय गरेको छ ।

७ भदौमा कैलालीको टीकापुरमा ज्यान गुमाएका सुरक्षाकर्मीका परिवारसहित तराई मधेशका विभिन्न ठाउँमा भएका प्रदर्शनका क्रममा मृत्यु भएकाहरुका आफन्तलाई जनही रु १० लाख दिने सरकारले निर्णय गरेको सञ्चारमन्त्री मिनेन्द्र रिजालले जानकारी दिए ।

त्यसैगरी आन्दोलनकै क्रममा घाइते भएका सबैको स्वास्थ्योपचार पनि सरकारले निशुल्क गराउने भएको छ ।

मन्त्रिपरिषद बैठकले आन्दोलनका क्रममा गिरफ्तार भएकाहरुमाथि चाँडै छानविन गरी मुद्दा टुंगोमा पुर्‍याउने निर्णय पनि गरेको छ ।

१ असोजमा बसेको मन्त्रिपरिषद बैठकले संविधानसभाबाट संविधान पारित भएको खुशीयालीमा ३ र ४ असोजमा सार्वजनिक विदा दिने निर्णय गरेको छ ।

त्यसैगरी नेपालका अस्पतालबाट विदेशी नागरिकलाई सरोगेसी सेवा उपलब्ध गराउने सरकारको अघिल्लो निर्णयलाई आजको मन्त्रिपरिषद बैठकले वदर गरेको पनि मन्त्री रिजालले जानकारी दिए ।

यस्तै विशेष आर्थिक क्षेत्र विकास समितिको कार्यकारी निर्देशकमा चण्डिका भट्ट र अधिकार सम्पन्न वागमती सभ्यता एकीकृत विकास समितिको अध्यक्षमा किशोर शाक्यलाई नियुक्त गर्ने बैठकले निर्णय गरेको छ ।

आजैदेखि लागू हुने गरी विश्वकर्मा पूजालाई राष्ट्रिय पर्वको मान्यता दिइने पनि बैठकले निर्णय गरेको छ । यद्यपी यस पर्वका अवसरमा सार्वजनिक विदा भने नदिइने मन्त्री रिजालले जानकारी दिए ।

कपिल भट्ट, काठमाडौं

प्रतिकृया दिनुहोस