नेपालमा संविधान प्रारम्भ भएको घोषणा हुँदै गर्दा भारतीय विदेश मन्त्रालयले विज्ञप्ति जारी गरी भारतसँग सीमा जोडिएका क्षेत्रमा हिंसा बढेकोमा आफ्नो ध्यानाकर्षण भएको जनाएको छ ।

विज्ञप्तिमा ‘नेपालमा संविधान घोषणा भएकोतर्फ हामीले ध्यान दिएका छौं’ भन्दै समस्याको समाधान हिंसारहित वातावरणमा वार्तामार्फत गर्न आग्रह गरिएको छ ।

विज्ञप्तिमा संविधानले सद्भाव, प्रगति र विकासको जग बसाल्ने भन्दै नेपाली जनताप्रति शुभकामना पनि व्यक्त गरिएको छ ।

विज्ञप्तिको पूर्णपाठ (भावानुवाद)
नेपालको संविधान निर्माणको प्रक्रियाभर नै भारतले संघीय, लोकतान्त्रिक, गणतान्त्रिक र समावेशी संविधानको समर्थन गर्दै आएको हो ।

आज नेपालमा संविधान घोषणा भएकोतर्फ ध्यान दिएका छौं । भारतसँग सीमा जोडिएका नेपालका केही भागमा भएको हिंसाप्रति हाम्रो ध्यानकर्षण भएको छ । काठमाडौंमा रहेका हाम्रा राजदूतले यसबारे नेपालका प्रधानमन्त्रीसँग कुरा गर्नु भएको छ । हामी त्यहाँको समस्या शान्तिपूर्ण, हिंसारहित वातावरणमा वार्ताद्वारा समाधान गर्न आग्रह गर्दछौं र संविधान व्यापक सहमति र स्वामित्वमा संस्थागत होस् भन्ने चाहन्छौं । यसले नै नेपालमा सद्भाव, प्रगति र विकासको जग बसाल्नेछ ।

हामी नेपाली जनताप्रति शुभकामना व्यक्त गर्दछौं ।

प्रतिकृया दिनुहोस