थप समाचारसोमबार, आश्विन ४, २०७२

अब वारपारको लडाइँः राजेन्द्र महतो

हिमालखबर

mahatoसद्भावना पार्टीका अध्यक्ष राजेन्द्र महतोले संविधानमा मधेशी र थारुको अधिकार स्थापित नभएको भन्दै आन्दोलन जारी राख्ने बताएका छन् ।

प्रदर्शनका क्रममा घाइते भएकाहरुलाई भेट्न ४ असोज विहान नारायणी उपक्षेत्रीय अस्पताल, वीरगञ्ज पुगेका महतोले अब वारपारको लडाइँ हुने बताए । उनले भने “यो आरपारको लडाइँ हो । जबसम्म हाम्रो माग सुनुवाई हुँदैन तबसम्म आन्दोलन रोकिदैन्।”

मधेशविरोधी संविधान जारी भएको दाबी गर्दै उनले संविधान जलाउने बताए । “शान्तिपूर्ण आन्दोलनमा रहेका नागरिकको शिरमा, छातीमा गोली हानिएको छ, यही लोकतन्त्र हो ?” उनले प्रश्न गरे ।

अस्पताल परिसर बाहिर ‘नेपालको संविधान २०७२’ लेखिएको कागज जलाउँदै उनले बहुमतको आडमा तीन दलले जबरजस्ती ल्याएको संविधान तराई मधेशका गाँउ गाँउमा जलाइने बताए ।

३ असोजमा आन्दोलनकारीहरुले अस्पताल परिसरमै पत्रकारहरु माथि हातपात गरेको विरोधमा निकै कम संख्यामा मात्रै पत्रकार अस्पताल परिसरमा पुगेका थिए ।

यसअघि वीरगन्जमा स्थानीय प्रशासनले बिहान ७ बजेदेखि ९ बजेसम्म दुई घण्टा कर्फ्यू हटाएको थियो ।

बिहान ९ बजे देखि फेरि अनिश्चितकालीन कफर्यु जारी रहेको पर्साका सहायक प्रमुख जिल्ला अधिकारी अनुज भण्डारीले जानकारी दिएका छन् ।

वीरगन्जमा कर्फ्यू लगाइएको भएपनि ठाँउ ठाँउमा मधेशी मोर्चाका कार्यकर्ता र स्थानीयले टायर बालेर प्रदर्शन गरिरहेका छन् । महतो केही दिनदेखि वीरगञ्जमै केन्द्रित भएर आन्दोलनको नेतृत्व गरिरहेका छन् ।
सुरेश बिडारी, वीरगञ्ज

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...