बाराको कलैयामा आगजनी र तोडफोडमा उत्रिएका मधेशी मोर्चाका कार्यकर्ता र प्रहरीबीच  झडप भएपछि स्थिति तनावग्रस्त भएको छ ।

स्थिति नियन्त्रणमा लिन प्रहरीले अश्रुग्यास र हवाइ फायर गरेको छ । झडपका क्रममा प्रहरीले हानेको लाठीले लागेर तमलोपाका केन्द्रीय सदस्य जितेन्द्र सिंह र कार्यकर्ता मोहन साह घाईते भएको तमलोपा बाराका प्रवक्ता अरुण सिंहले जानकारी दिए ।

कलैया–५ पन्नाबागस्थित नेकपा एमालेको जिल्ला कार्यालय र कलैया–६ मोतिबाग पानीटंकीमा रहेको नेपाली कांग्रेसको जिल्ला पार्टी कार्यालय जलाउन पुगेका आन्दोलनकारीलाई रोक्न प्रहरीले अश्रुग्यास र हवाइ फायर गरेको थियो ।

त्यसैक्रममा प्रदर्शनकारी र प्रहरीबीच झडप भएको हो ।

यसअघि मोर्चाका कार्यकर्ताहरु नेपाली कांग्रेस बाराका सभापति एवं सभासद राधेचन्द्र यादवको घरमा तोडफोड गरेका छन् । कलैयाको भरतचोकमा रहेको सभासद यादवको घरमा प्रदर्शनकारीहरुले तोडफोड गरेका हुन् ।

उनीहरुले सभासदको घरमा रहेको सामाग्री बाहिर निकालेर आगजनी समेत गरेका छन् ।

त्यस्तै आन्दोलनकारीहरुले नेपाली कांग्रेसका केन्द्रीय सदस्य एवं सभासद फरमुल्लाह मन्सुरको घरमा समेत तोडफोड गरेका छन् । कलैया ७ घुसुकपुरस्थित मन्सुरको घरमा मोर्चाका कार्यकर्ताहरुले तोडफोड गरेका हुन् ।

मन्सुरको घरको ताल्चा फोडेर प्रदर्शनकारीहरुले घर भित्र रहेको फर्नीचर लगायतका सामाग्री निकालेर जलाई दिएका छन् ।

आन्दोलनकारीहरुले घरमा रहेका फर्निचर, टिभि लगायका समान बाहिर निकालेर जलाएका छन् । प्रदर्शनकारीले हानेको ढुङ्गाले लागेर मन्सुरको घरको शिशा समेत फुटेको छ ।

त्यस्तै सांसद लालबाबु सिंहको घरमा तोडफोड भएको छ ।

प्रदर्शनकारीहरुले कलैयामा रहेका मालपोत, नापी, भूमिसुधार सहितका बिभिन्न कार्यालयमा पनि तोडफोड भएको छ ।

कोष तथा लेखा नियन्त्रण कार्यालय, भूसंरक्षण र नगरपालिका लगायत केहि सरकारी कार्यालयमा आगजनी समेत भएको छ ।

सञ्चारकर्मीहरु माथि दुर्व्यबहार
बारामा प्रर्दशनकारीहरुले सञ्चारकर्मीहरु माथि समेत दुर्व्यबहार गरेका छन् । नेपाल पत्रकार महासंघ बारा शाखाका सचिव जय नारायण यादव, गोरखापत्रका बारा संवाददाता शिव शंकर मिश्र तथा एभिन्युजका बारा संवाददाता भैयाराम साहमाथि दुर्व्यबहार गरेका हुन् ।

उनीहरुले कलैयाको भरत चोकमा समाचार संकलनका लागि जाँदा हातपात गरेको पत्रकार जय नारायण यादवले जानकारी दिए ।
यसैबीच नेपाल पत्रकार महासंघ बारा शाखाले समाचार संकलनका लागि गएका सञ्चारकर्मी प्रति दुव्र्यबहार गरिएको घटना प्रति गम्भिर ध्यानाकर्षण भएको जनाएको छ ।

महासंघ बाराका अध्यक्ष कमल कुमार उपाध्यायले ४ असोजमै विज्ञप्ती निकालेर आन्दोलनरत पक्षलाई समाचार संकलनको वातावरण बनाउन आग्रह गरेका छन् ।

सुरेश बिडारी, वीरगञ्ज

प्रतिकृया दिनुहोस