अर्थ/बजारमंगलबार, आश्विन ५, २०७२
लगातारको वन्दका कारण उद्योग–व्यवसाय प्रभावित
एक महिना बढीको बन्द हड्तालका कारण जिल्लाको चन्द्रौटा कृष्णनगर क्षेत्रमा रहेका दुई दर्जनभन्दा बढी उद्योगहरु प्रभावित भएका छन् ।
मधेशी मोर्चाले आह्वान गरेको वन्दका कारण उद्योगलाई चाहिने कच्चा पदार्थको अभाव एकातिर छ भने अर्कोतिर उद्योग सञ्चालन नगर्न मोर्चाले दबाब दिइरहँदा सञ्चालन हुनसक्ने उद्योग पनि बन्द छन् ।
यहाँका उद्योगहरुमा ज्यालादारीमा काम गर्ने २ हजारभन्दा बढी मजदुरहरु पनि बेरोजगार हुन पुगेका छन् ।
बन्दका कारण दैनिक १ करोडभन्दा बढी घाटा भएको उद्योगीहरुको भनाई छ ।
यसक्षेत्रमा हाल ५ वटा सिमेन्ट कारखाना, आधा दर्जन प्लाइ र कपास उद्योग, एक चिनी मिल र २ बटा रोजिन एण्ड टरर्पेनटाइन उद्योग लगायत खाद्यान्न तथा अन्य उद्योगहरु छन् ।
यी बाहेक महाशक्ति, कपिलवस्तु र बुद्ध सिमेन्ट उद्योग पनि सञ्चालनको तयारीमा छन् । त्यस्तै महालक्ष्मी मल र आधा दर्जन इँटा उद्योगहरु सञ्चालनमा थिए ।
लोडसेडिङको मार खेपेका उद्योगहरु पछिल्लो समयको बन्दले गर्दा थप पीडित बनेका छन् ।
शान्ति प्रकृयासँगै नेपालमा चाँडै संविधान जारी भए संक्रमणकालको मारबाट वच्ने र शान्ति सुव्यवस्था कायम भई उद्योग विस्तार हुने अपेक्षा राखेको भए पनि संविधान जारी भएपछि हिंसा र बन्द झन बढदा दुख लागेको चन्द्रौटा उद्योग वाणिज्य संघका अध्यक्ष जमशेर अलीले बताए ।
गोपाल भण्डारी, कपिलवस्तु