भारतले नाकाबन्दी गरेको तेस्रो दिनदेखि झापाका बजारमा उपभोग्य सामानको भाउ बढेको छ ।

खुद्रा ब्यापारीले ९ असोज बिहानदेखि पश्चिम दमक बजारमा सेतो आलुको भाउ ८५ रुपैयाँ र प्याज १२० रुपैयाँ प्रतिकिलो पुर्‍याएका छन् ।

अघिल्लो दिनको तुलनामा यहाँ सेतोआलु र प्याजको भाउ प्रतिकेजी बिस रुपैयाँ बढेको हो ।

झापाको बजारमा भारतको पश्चिम बंगाल र आसामबाट दैनिक सात थरी फलफुल र तरकारी आइरहेको हुन्छ ।

तीन दिनदेखि भारतीय सीमा पानीटंकीमा मालबाहक ट्रकहरु रोकिएका कारण यहाँ जगेडा रहेको आलु, प्याज र फलफुल सकिँदै गएपछि भाउ महंगो भएको हो ।

भारतबाट आयात भएको स्याउ र अनारको मूल्य पनि प्रतिकेजी रु २० सम्म बढेको छ ।

दमक– ११ को गौरब फलफूल पसलका मालिक जमसोद मियाँ आफूले मगाएको एउटा ट्रक स्याउ तीन दिनदेखि भारतको पानीटंकीमा रोकिएको बताउँछन् । “यहाँ पसल रित्तिसक्यो, उता ट्रकमा स्याउ कुहिन लागेको सुन्दैछु,” मियाँले भने ।

केरा, नासपाती र अन्य हरियो सागसब्जी भने सुनसरी, धनकुटा, तेह्रथुम, इलाम लगायतका जिल्लाबाट सहज आपूर्ती भइरहेको यहाँका ब्यापारीले बताएका छन् ।

यसैगरि झापाको बजारमा बिराटनगरबाट आँउने खानेतेलको भाउ तीन सातामा तीनपटक बढेर प्रति दश लिटर रु. १४०० पुगेको छ ।

तीन साताअघि सो परिमाणको खानेतेलका भाउ रु ११८० थियो ।

तराईमा जारी आन्दोलनका कारण ढुवानी हुन नसक्दा बजारमा खानेतेलको समेत अभाव हुँदै गएको छ । यस्तो बेला मौका छोपेर कालोबजारी गर्नेहरुले भाउ बढाएको उपभोक्ताहरुको गुनासो छ ।

यता झापाका सहायक प्रमुख जिल्ला अधिकारी कमलबहादुर थापाले झापाका केहि बजारहरुमा उपभोग्य सामग्री अभाव देखिन थालेको भन्दै बजार अनुगम शुरु गर्ने तयारी भएको बताएका छन् ।

थापाले ब्यापारीहरुले उपभोग्य बस्तुको स्टक लुकाएर बजारमा कृतिम अभाब सृजना गरेको जिल्ला प्रशासन कार्यालयमा गुनासो आएका कारण १० असोजदेखि बजार अनुगमन गरिने हिमालखबरलाई बताए ।
गोपाल गडतौला, झापा

प्रतिकृया दिनुहोस