बाँके, नेपालगञ्ज नजिकको भारतसँग जोडिएको जमुनाहा नाकामा मधेशी मोर्चाका नेता–कार्यकर्ताले दशगजा क्षेत्रमा प्रदर्शन गरिरहेका छन् ।

प्रदर्शनका क्रममा केहीबेर प्रहरी र प्रदर्शनकारीबीच झडप समेत भएको छ । प्रदर्शनकारीले हानेको ढुंगा लागेर प्रहरी नायव निरीक्षकसहित चार प्रहरी घाइते भएका छन् ।

घाइते हुनेमा सई दिलबहादुर घर्ती, हवल्दार सुरेश बस्याल, प्रहरी जवान कमल बिक र जवान कमल खनाल छन् ।

उनीहरुको भेरी अञ्चल अस्पताल नेपालगञ्जमा उपचार भैरहेको छ ।

प्रहरीका अनुसार तीनदिनदेखि सीमा नाका ठप्प हुँदा भारतीय सीमाक्षेत्रमा सयौं गाडी अलपत्र परेका छन् ।

सीमा क्षेत्रमा आज मधेशी मोर्चाका कार्यकर्ताले धर्ना दिए पनि हिंजोसम्म यहाँ न आन्दोलन थियो न धर्ना नै ।

तर पनि भारतीय पक्षले कुनै पनि मालबाहक गाडी तीन दिनदेखि नेपालतर्फ आउन दिएको छैन । आज, ९ असोजमा रुपैडिहामा नेपाली नागरिकहरु पनि जान सकेका छैनन् ।

भारतीय पक्षले नेपालको सीमा क्षेत्रमा आन्दोलन भइरहेकोले असुरक्षाका कारण मालवाहक गाडीहरु नेपालतर्फ पठाउन नसकिएको बताएपछि उक्त कुरालाई पुष्टि गराउन मोर्चाका नेता–कार्यकर्ताहरुले आजदेखि दशगजा क्षेत्रमै गएर प्रदर्शन थालेका हुन् ।

नेपालगञ्ज–रुपैडिहा नाका यस क्षेत्रको मुख्य सीमा नाका हो । पश्चिम क्षेत्रमा यही नाका भएर पेट्रोलियम पदार्थसहित दैनिक उपभोग्य सामान नेपाल भित्रिने गर्छन् ।
केशव राना, बाँके

प्रतिकृया दिनुहोस