वीरगन्जमा स्थानीय प्रशासनले लगाउँदै आएको कर्फ्यू र दङ्गा ग्रस्त क्षेत्र दुबै हटाएको छ ।

मधेशी मोर्चाको आह्वानमा तराईमा जारी आमहडतालका क्रममा हिंसात्मक झडप भएपछि वीरगञ्जमा स्थानीय प्रशासनले १४ भदौदेखि कर्फ्यू लगाउनुका साथै त्यसको भोलीपल्टदेखि वीरगञ्जलाई दंगाग्रस्त क्षेत्र घोषणा गरेको थियो ।

अहिले स्थिति सामान्य भएकोले कर्फ्यू र दङ्गा ग्रस्त क्षेत्र दुवै हटाइएको पर्साका सहायक प्रमुख जिल्ला अधिकारी अनुज भण्डारीले जानकारी दिए ।

उनले भने, “केही दिनदेखि स्थिति सामान्य देखियो । बिहान बसेको जिल्ला सुरक्षा समितिको बैठकले कर्फ्यू र दङ्गाग्रस्त क्षेत्र घोषणा हटाउने निर्णय गरेको छ ।”

यसअघि मधेशी मोर्चाले सरकार र तीन दलसँग वार्ताका लागि कर्फ्यू र दंगाग्रस्त क्षेत्र घोषणा हटाउन माग गर्दै आएको थियो भने सरकारले पनि स्थिति सामान्य बनाउन मोर्चासँग आग्रह गरेको थियो ।

आज रौतहटमा बसेको मोर्चाको बैठकले आन्दोलनको स्वरुप परिवर्तन गर्ने निर्णय गरेलगत्तै वीरगञ्जबाट कर्फ्यू हटाइएको छ ।

कर्फ्यू र दंगाग्रस्त क्षेत्र घोषणा हटाइए पनि मोर्चाले आह्वान गरेको बन्द यथावत नै रहेकोले वीरगञ्जमा बजार र यातायात सुचारु हुन सकेका छैनन् ।

अहिले मधेशी मोर्चा नेपाल भारत सीमा नाकामा धर्ना र प्रदर्शनमा केन्द्रित भएको छ ।

सुरेश बिडारी, वीरगञ्ज

प्रतिकृया दिनुहोस