नेपाली कांग्रेस केन्द्रीय समितिको बैठकले पार्टीको केन्द्रीय महाधिवेशन २० देखि २३ फागुन काठमाडौंमा गर्ने निर्णय गरेको छ ।

२० असोजमा प्रधानमन्त्री निवास बालुवाटारमा बसेको बैठकले पार्टीको १३ औं महाधिवेशन २० देखि २३ फागुनसम्म काठमाडौंमा हुने भएको छ ।

यसअघि वडा, गाउँ–नगर अधिवेशन १५ र १६ माघ, क्षेत्रीय अधिवेशन २२ माघ र जिल्ला अधिवेशन २५ माघसम्म सम्पन्न गरिसक्ने निर्णय भएको कांग्रेस प्रवक्ता दिलेन्द्रप्रसाद बडुले जानकारी दिए ।

त्यसैगरी बैठकले संविधानका केही बुँदामा असन्तुष्टि जनाउँदै तराई मधेशमा आन्दोलन गरिरहेका दल र समूहसँग तीनदलको वार्ता प्रक्रिया शुरु भइसकेकाले आन्दोलनका सबै कार्यक्रम स्थगित गरी वार्ता मार्फत नै समाधान खोज्न आग्रह गरेको छ ।

वार्ता टोलीका संयोजक एवम् वनमन्त्री महेश आचार्यले वार्तामा भएको प्रगति बारे बैठकलाई अवगत गराएका थिए ।

वार्ता सकारात्मक रुपमा अघि बढेको भन्दै प्रवक्ता बडुले आन्दोलनकारीका कतिपय मागहरु पूरा भइसकेको र केही मागहरु बारे छिट्टै निर्णयमा पुगिने बताए ।

बैठकमा सरकार गठनबारे भने कुनै निर्णय नभएको र २१ असोज विहान बस्ने बैठकले यससम्बन्धमा निर्णय गरिने भएको छ ।

त्यसैगरी बैठकले भूकम्प प्रभावित क्षेत्रका लागि पार्टीले देशविदेशबाट संकलन गरेको रु १ करोड ८१ लाख १२ हजार प्रधानमन्त्री राहतकोषमा उपलब्ध गराउने समेत निर्णय गरेको छ ।

कपिल भट्ट, काठमाडौं

प्रतिकृया दिनुहोस