संयुक्त लोकतान्त्रिक मधेशी मोर्चाले सीमाकंनको विषय टुंग्याउनुपर्न अडान लिएपछि दोस्रो वार्ता पनि निष्कर्षमा पुग्न सकेन ।

सरकारी वार्ता टोलीले सीमाकंन आयोगमार्फत टुंग्याउने प्रस्ताव राखेपनि मोर्चाका वार्ता टोली सहमत हुन नसकेको सरकारी वार्ता टोलीका सदस्य महेश आचार्यले बताए । उनका अनुसार मोर्चाले सीमाकंन राजनीतिक तहमै समाधान हुनुपर्ने अडान लिएको छ ।

मोर्चाको तर्फका वार्ता टोली सदस्य लक्ष्मणलाल कर्णले भने सरकारी वार्ता टोली ठोस रुपमा प्रस्तुत नभएकाले सहमति हुन नसकेको बताए ।

सरकारले घाइतेको उपचारलगायत केही माग पूरा गरेपनि आन्दोलनका क्रममा लगाइएका मुद्दा फिर्ता, मृतकलाई सहीद घोषणा र क्षतिपूर्ति, निषेधाज्ञा र कर्फ्यू हटाउनेलगायत माग सम्बोधन नभएको कर्णले बताए ।

उनले भने, “वार्ता टोलीलाई संवैधानिक प्रश्नमा २ पार्टी बीचमा छलफल गरेर ठोस प्रस्ताव लिएर आउनुहोस् भनेका छौं ।” मोर्चासँगको अर्काे बैठक २२ असोजमा राखिएको छ ।

सम्वादमार्फत समस्या सुल्झाउने प्रतिवद्धता जनाउँदै तराई–मधेशमा जारी आन्दोलनको रुप बदल्न आग्रह गरेपनि मोर्चा तयार नभएको एमाओवादी नेता एवम् वार्ता टोली सदस्य नारायणकाजी श्रेष्ठले बताए ।

-कपिल भट्ट, काठमाडौं

प्रतिकृया दिनुहोस