भारतले लगाएको नाकाबन्दीले नेपालमा असहज स्थिति उत्पन्न भएपछि पशुपतिनाथमा क्षमापूजा गरिएको छ ।

२१ असोज विहान पशुपतिनाथ मन्दिर परिषरमा भारतीय प्रधानमन्त्री मोदीको पापमोचनका लागि भन्दै सांकेतिक र व्यंग्यात्मक क्षमापूजा गरिएको हो ।

नेपाल आएका बेला पशुपतिनाथमा लामो पूजाआजा गरेका मोदीले अहिले पशुपतिनाथकै देशलाई अप्ठ्यारोमा पारेर, नेपालीको जनजीवन अस्तव्यस्त पारी ‘पाप’ गरेको भन्दै उनको पाप मोचनका लागि पूजा गरिएको सहभागीले बताए ।

क्षमापूजामा कलाकारहरु हरिवंश आचार्य, मदनकृष्ण श्रेष्ठ, पूर्व मुख्य सचिव लीलामणि पौडेल, साहित्यकार कमल दीक्षित, नागरिक अगुवा लगायत सर्वसाधारणको सहभागिता थियो । पूजामा कलाकार मनोज गजुरेल मोदीकै रुप बनाएर सहभागी भएका थिए ।

क्षमा पूजामा बोल्दै कलाकार मदनकृष्ण श्रेष्ठ र हरिवंश आचार्यले भारतले नेपाली जनतालाई दुःख दिईरहेकोमा उनलाई पशुपति नाथले सदबुद्धी देउन् भनेर पूजामा सहभागी भएको बताए ।

मोदी नेपाल आएकाबेला ठूलो स्वागत–सम्मान गरेका नेपालीलाई अहिले उनले सास्ती दिएर संसारलाई आश्चर्यमा पारेको श्रेष्ठले बताए । भने “ मोदी जस्तो नेतालाई यसरी नाकाबन्दी गर्न शोभा दिदेन । बिन लादेनले अमेरिकामा गरेको आक्रमण भन्दा ठूलो ज्यादती हो यो । यसले करौडो मान्छेलाई कष्ट दिएको छ ।”

हरिवंश आचार्याले संविधानबाट असन्तुष्टहरुको चित्त बुझाउन नेपालभित्रै वार्ता गरेर समाधानको प्रयास भइरहेका बेला भारतले नाकाबन्दी गरेर ठाडो हस्तक्षेप गरेको बताए ।

उनले भने “ नेपालभित्रको समस्या हल गर्न नेपाल सक्षम छ ।”

महले नाकाबन्दीको मारमा परेका नेपाली जनताको आँशुले भरिएको बोतल मोदी बनेका मनोज गजुरेललाई हस्तानतरण गरेका थिए ।

मोदीको भेषमा रहेका गजुरेलले आफू (मोदी) अमेरिका गएको बेला भारतबाट भएको नाकाबन्दीले नेपाली जनतालाई दुःख भएकोमा क्षमा माग्दै नाकाबन्दी आजबाटै खोलेको बताएर व्यंग्य गरेका थिए ।
शब्द÷तस्वीरः डम्बरकृष्ण श्रेष्ठ

प्रतिकृया दिनुहोस