सुनौली नाका तनावग्रस्त बनेपछि संयुक्त लोकतान्त्रिक मधेशी मोर्चाका प्रमुखहरु भैरहवा पुग्दैछन् ।

संघीय समाजवादी फोरम नेपालका अध्यक्ष उपेन्द्र यादव, तराई–मधेश लोकतान्त्रिक पार्टीका अध्यक्ष महन्त ठाकुर र तराई–मधेश सद्भावना पार्टीका अध्यक्ष महेन्द्र यादव भैरहवा जाँदैछन् । सद्भावना पार्टीका अध्इक्ष राजेन्द्र महतो भने केही दिनदेखि भैरहवा नै छन् ।

उनकै नेतृत्वमा सुनौली नाकामा धर्ना बस्ने क्रममा २० असोजमा तनाव भएको थियो । भारतीय भूमिबाट नेपालका प्रहरी, सीमा प्रहरी कार्यालय र सर्वसाधरणमाथि ढुंगा प्रहार गरेपछि तनावपूर्ण अवस्था सृजना भएको थियो ।

मोर्चाका प्रमुखहरु नै भैरहवा पुग्ने भएपछि प्रहरीले उच्च सतर्कता अपनाएको जनाएको छ ।रुपन्देहीका प्रहरी प्रमुख बुद्धिराज गुरुगले भने, “सुरक्षामा केही नयां चुनौती देखिएको छ । सामना गर्न उच्च सतर्कता अपनाएकाछौं ।”

यसैबीच, आज बिहान भैरहवाको गौतमबुद्ध बिमानस्थल क्षेत्र नजिकै बम बिष्फोट भएको थियो । बिष्फोटबाट कुनै क्षति भने हुन पाएन ।

-दीपक ज्ञवाली, बुटवल

प्रतिकृया दिनुहोस