मधेशमा आन्दोलन जारी रहेका बेला संविधानबारे जनतालाई बुझाउँदै सांसद देवकरणप्रसाद कलवार नवलपरासीका बजार–गाउँ घुमिरहेका छन् ।

नयाँ संविधानले तराई–मधेशका अधिकांश मागहरु पूरा गरेको बताउने उनले संविधानबारे जनतामा भ्रम छरिएकाले आन्दोलन उग्र हुन पुगेको बताए ।

नवलपरासी जिल्लाको क्षेत्र नं. ६ बाट तपमलोपाका प्रभावशाली नेता हृदयेश त्रिपाठीलाई हराउंदै संविधान सभा एवम् सांसद सदस्य बनेका कलवारले आफ्नो क्षेत्रका गाउँहरुमा पुगेर जनतालाई संविधानबारे जानकारी गराइरहेको बताए ।

“समावेशी, समानुपातिक प्रतिनिधित्व लगायतका विषयहरु संविधानले नै सम्वोधन गरेको छ, संवोधन हुन नसकेका विषयहरुलाई संविधान संशोधन गरेर पुरा गरिंदैछ,” कलवारले भने, “अनावश्यक भ्रम र उत्तेजना फैलाएर आन्दोलनलाई उग्र बनाउने काम कसैले पनि गर्नु हुँदैन ।”

उनले वार्ताको माध्ययमबाट संविधान संशोधनको प्रक्रिया अघि बढाउन तर्फ लाग्न समेत आन्दोलनरत मोर्चालाई आग्रह गरेका छन् ।

भारतले गरेको अघोषित नाकावन्दीका कारण जनजीवन असहज भएको भन्दै कुटनीतिक प्रयास अघि बढाउन कलवारले सरकारसँग माग गरेका छन् ।

गोपाल भण्डारी, नवलपरासीबाट

प्रतिकृया दिनुहोस