नेकपा एमालेका अध्यक्ष केपी ओली प्रधानमन्त्री निर्वाचित भएपछि उनको गृह जिल्ला झापामा एमाले कार्यकर्ताले दिपावली गरेका छन् ।

अपह्रान्ह ५ः३० बजे पश्चिम झापाको दमकस्थित गणतन्त्र चोकमा भेला भएका सयौं एमाले कार्यकर्ताले मिठाई बाँडेका थिए । उनीहरुले आतासबाजी गर्दै दिपावली गरेका छन् । दमक–१०, स्थित ओली निबास रहेको टोलमा पनि अलग्गै दिपावली गरिएको छ ।

खुशीयाली मनाइरहेका एकजना युबक राजकुमार थापा ओलीलाई जनताको भाषा बोल्न सक्ने नेता मान्छन् । “मलाई उहाँ मनपर्नुको कारण यहि हो”, उनी भन्छन्, “उहाँँ अरु कत्तिपय नेता जस्तो घुमाउरो र अस्पष्ट बोल्नुहुन्न ।”

पश्चिम झापाको दमक गणतन्त्र चोकमा खुशीयाली चलिरहँदा करीव ८ किलोमिटर दक्षिण लखनपुर–६, का ७७ बर्षे प्रेमप्रसाद खरेल घरकै काममा ब्यस्त थिए । रातोदिन टेलिभिजनमा छाइरहेका भाञ्जालाई उनी टाढैबाट आशिर्बाद दिइरहेका छन् ।

उनी भन्छन्, “मेरा भाञ्जा भाग्यमानी रहेछन्, देशलाई राम्रोबाटोमा लैजाउन ।” खरेल ओलीका मामा हुन । २०११ सालमा आमा बितेपछि मामाघर गएका ओलीसँग प्रेमप्रसादको २०२२ र २०४४सालमा मात्र भेट भएको थियो ।

उनले भने, “ध्रुब भाञ्जा त भित्रभित्रै ठुलो नेता भइसकेका रहेछन् ।” ओलीको बाल्यकालको नाम ध्रुब हो ।

४९ बर्षदेखि बाम राजनीतिमा निरन्तर लागेका ६४ बर्षे नेताले २०२७ देखि २०४४ सम्म जेल जीबन बिताएका हुन । उनी त्यसअघि भुमिगत भएर झापा र मोरङका भित्रि गाँउहरुमा पार्टी संगठन निर्माणमा संलग्न थिए ।

२०४८, २०५१ र २०५६ झापा ६बाट निर्वाचित ओली २०६४सालको संबिधान सभा निर्बाचनमा भने पराजित भएका थिए ।

पार्टीको आन्तरिक जीवनमा पनि निरन्तर चुनौतीको सामना गर्दै हुर्किएको ओलीको राजनीतिक यात्रा परिक्षाको मैदानमा उत्रिएको उनीलाई चिन्नेहरु बताँउछन् । एमाले झापाका एकजना जिल्ला कमिटी सदस्य भन्छन्, “हक्कीपना र निरन्तरता, उहाँबाट सिक्ने कुरा यिनै हुन ।”

-गोपाल गडतौला ,झापा

प्रतिकृया दिनुहोस