भारतसँग जोडिएको सुदुरपश्चिमका नाकाहरु २६ असोजदेखि सामान्य बन्दै छन् । कैलालीको त्रिनगर–गौरिफण्टा नाकाबाट ९ ट्यांकर पेट्रोल र १३ ट्यांकर डिजेल भित्रिएको छ ।

कञ्चनपुर, दार्चुला, बैतडी, डडेल्धुरा र कञ्चनपुरका नाका केही दिन अघिदेखि नै सहज बनेका भएपनि इन्धन भित्र्याउने सुदूरपश्चिमको एकमात्र कैलालीको त्रिनगर भन्सार नाका २६ असोज बिहानदेखि सहज बन्न थालेको छ ।

‘‘अब सामान्य भइसक्यो, कुनै रोकटोक छैन । पेट्रोलियम पदार्थका गाडी पनि आउन थालिसके,’’ कैलालीको धनगढी, त्रिनगर भन्सार कार्यालयका प्रमुख मानप्रसाद विकले भने ।

सुदूरपश्चिमका अन्य नाकाहरुबाट दैनिक उपभोग्य सामान आयात हुने भएपनि त्रिनगर नाकाबाट मात्रै पेट्रोलिय पदार्थ र अन्य सामानसहितका गाडी आउने गरेका छन् । आज दिउँसोसम्म ९ ट्यांकर पेट्रोल र १३ ट्यांकर डिजेल यो नाकाबाट नेपाल भित्रेको छ ।

दैनिक उपभोग्य सामानका गाडी तीनदिन अघिदेखि आउन थालेको भएपनि पेट्रोलियम पदार्थका ट्याङ्कर २५ साँझदेखि आउन थालेको नेपाल आयल निगम क्षेत्रीय कार्यालय धनगढीका प्रमुख शरद पौडेलले बताए ।

‘‘केही हिजो साँझ आए, केही आज आउँदैछन, ’’ क्षेत्रीय प्रमुख पौडेलले भने ।

२५ असोज साँझ भारतको बन्थारा, साँझापुरबाट पेट्रोल २ ट्याङ्कर, डिजेल १८ ट्याङ्कर आएको थियो । हिजै पेट्रोल लिन नेपालबाट २२ वटा ट्याङ्कर बन्थारा पुगेको आज विहान पेट्रोल लोड गरे पनि अझै भित्रिइनसकेको पौडेलले जानकारी दिए ।

‘‘केही दिन अघिसम्म १० प्रतिशत मात्रै थियो, हिजोसम्म ५० प्रतिशत आपूर्ति भएको छ । आज ति सबै आए भने पेट्रोलियम पदार्थको आपूर्ति सहज हुन्छ’’ क्षेत्रीय प्रमुख पौडेलले भने ।

बच्चु विक, महेन्द्रनगर

प्रतिकृया दिनुहोस