रातो मछिन्द्रनाथको भोटो १ कात्तिकमा पुनः दोस्रोपटक देखाइने भएको छ ।

हरेक वर्ष जावलाखेलमा भोटो देखाएपछि रथ जात्रा समापन हुने भए पनि यस वर्ष देवताको १२ वर्षे रथ जात्रा परेकाले जावलाखेल र बुङमती गरी दुई स्थानमा भोटो देखाउने प्रचलनअनुसार आगामी १ गते पुनः भोटो देखाउने तयारी रहेको गुठी संस्थान ललितपुरका प्रमुख रुद्रनाथ अधिकारीले जानकारी दिए ।

अधिकारीका अनुसार अन्य समयमा जावलाखेलमा भोटो देखाएर जात्राको अन्त्य हुने भए पनि यस वर्षको मेलालाई विशेष रुपमा लिने भएकाले रथ निर्माण गरिएको स्थान बुङमतीमा पनि भोटो देखाउन लागिएको हो ।

प्रत्येक १२/१२ वर्षको रथ जात्रालाई विशेष महत्वका साथ लिने भएकाले यस वर्ष जावलाखेलमा भोटो देखाएपछि रथलाई तानेर बुङमती पुर्‍याएको चौथौ दिन प्रचलन अनुसार भोटो देखाइने पुजारी विनोद बज्राचार्यले बताए ।

रथ जात्राअन्तर्गत गत ६ वैशाखमा रथारोहण गरी ९ गतेदेखि रथ जात्रा शुरु गरेकामा १२ गतेको भूकम्पका कारण रथमा क्षति पुगेको र लगत्तै मलमास शुरु भएकाले ४ असोजमा फेरि रथारोहण गरी ५ गतेदेखि जात्रा शुरु भएको थियो ।

प्रतिकृया दिनुहोस