भारतले गरेको नाकाबन्दी कहिले कडा त कहिले खुकुलो भनिए पनि २५ दिन पुग्दासम्म पूर्वको काकडभिट्टा–पानीटंकी नाकाबाट इन्धन आयात नगन्य छ ।

पछिल्लो समय फलफूल, तरकारी, औद्योगिक सामाग्री जस्ता सामान केही आउन दिए पनि यो नाकाबाट पेट्रोलियम पदार्थको आयात भने करिब ठप्पै छ ।

३० असोजमा अपराह्न सम्ममा काकडभिट्टा–पानीटंकी नाकाबाट ४४ वटा मालबाहक साधन भित्रिए, जसमध्ये पेट्रोलियम पदार्थको एउटामात्रै गाडी आयो– हवाई इन्धनको एउटा ट्यांकर ।

मधेशमा जारी आन्दोलनका कारण असुरक्षाले गर्दा सीमा अवरुद्ध भएको बहान बनाउने भारतले कुनै आन्दोलन र हडताल नभएको यो नाकामा अन्य ठाउँभन्दा कडाई गर्दै आएको छ ।

कुण्डुले खबर गरेनन्
आयल निगमको चारआलीस्थित कार्यालयले भारत गएका टयंकर कहिले भरिएर आँउछन् ठेगान नभएको जनाएको छ ।

निगमको चारआलीस्थित कार्यालयबाट गाडीमा सवा घण्टामा पुगिने भारतको न्युजलपाईगुढी रेल्वे स्टेसन नजिकको भारतीय डिपोमा निगमले सहयोगी (मुन्सी) कुशल कुण्डु लाई खटाएको छ ।

डिपोमा निगमका कतिवटा ट्यांकर भरिंदैछन् भन्ने दैनिक अग्रिम जानकारी गराउने कुण्डुले ३० असोज अपराह्नसम्म निगमलाई कुनै खबर दिएका छैनन् ।

इण्डियन आयल कर्पाेरेसन (आइओसी) को मुम्बईस्थित कार्यालयबाट निर्देशन नआउन्जेल भारतीय डिपोमा नेपाली ट्यांकर भरिँदैनन् ।

“नाकाबन्दी अघि भारतीय कर्मचारी सजिला थिए,” नेपाल आयल निगमका ति कर्मचारीले हिमालसँग भने, “अहिले त फोनमा कुरागर्न समेत आनाकानी गर्छन ।”

यता इन्धनको अभाबका कारण मेचीको जनजीवन नराम्रोसँग प्रभााबित भइरहेको छ ।

व्यवसायमा धक्का
पहाडी जिल्लाहरु इलाम, पाँचथर र ताप्लेजुङमा चाडबाडको मुखमा अन्न, कपडा, औषधी, बिस्कुट, नुन जस्ता उपभोग्य बस्तु पठाउन नसकिएको ब्यापारीहरु बताँउछन्

उद्योग वाणिज्य संघ दमकका अध्यक्ष प्रकाश प्रसाई भन्छन्,“बिक्रीको सिजन पर्खिएका व्यबसायीहरुलाई नराम्रो धक्का लागेको छ ।”

पहाडी जिल्लामा पठाउने त्यस्ता सामग्री झापाका बिर्तामोड, धुलाबारी, काँकडभिट्टा, दमक र भद्रपुरका गोदाममा थन्किएका छन् ।

सवारी साधन कम गुड्नाले दशैंका बजारमा मानिसहरुको चहलपहल समेत घटेको छ ।

गंगाप्रसाद ढकाल २१० वटा बस रहेको पूर्वाञ्चल यातायात संघका अध्यक्ष हुन । झापा, मोरङ र सुनसरीका ग्रामिण इलाकमा आउजाउ गर्ने त्यस्ता बसहरुमध्ये १३० वटा ग्यारेजमै थन्किएको ढकालले बताए ।
गोपाल गडतौला, झापा

प्रतिकृया दिनुहोस