नेपाल मेडिकल काउन्सिलले यस वर्षका लागि त्रिभुवन विश्वविद्यालय र काठमाडौं विश्वविद्यालय अन्तर्गतका मेडिकल कलेजहरुमा विद्यार्थी संख्या निर्धारण गरेको छ ।

काउन्सिलको २५ र २९ असोजमा बसेको पूर्ण बैठकले शैक्षिक सत्र २०७२/०७३ का लागि २३ मेडिकल कलेजको एमबिबिएस र बिडिएस(डेन्टल) का लागि सिट निर्धारण गरेको हो ।

यस वर्ष काउन्सिलले जानकी मेडिकल कलेज जनकपुर र देवदह मेडिकल कलेज रुपन्देहीका लागि सिट संख्या शून्यमा झारिदिएको छ ।
२३ मेडिकल तथा डेन्टल कलेजमा एमबिबिएसमा कुल १,९७५ र बिडिएसमा ४७० विद्यार्थीले अध्ययन् गर्नेछन् । अघिल्लो वर्ष एमबिबिएसमा कुल २,२४६ र बिडिएसमा कुल ५९५ सिट निर्धारित थिए ।

काउन्सिल प्रवक्ता डा. कृष्ण अधिकारीका अनुसार यस वर्ष पहिलेको तुलनामा अधिकांश कलेजको सिट कटौति गरिएको छ । कलेजमा उपलब्ध भौतिक पूर्वाधार र फ्याकल्टीका आधारमा सिट निर्धारण गरिएको डा. अधिकारीले बताए ।

उनले देवदह कलेजको विषयको मुद्दा अदालतबाट टुङ्गिन नसकेकाले उक्त कलेजको निरिक्षण नगरिएको र त्यसैकारणले सिट पनि निर्धारण नगरिएको प्रष्ट्याए ।

मुलुकमा नेपाल मेडिकल काउन्सिलले गरेको सिट निर्धारणका आधारमा नीजि तथा सरकारी मेडिकल कलेजले एमबिबिएस, बिडिएस, एमडी(स्नाकोत्तर) र एमएस तहमा तोकिएको सिट संख्याका आधारमा विद्यार्थी भर्ना गर्न पाउँछन् ।

रामु सापकोटा

प्रतिकृया दिनुहोस