वीरगन्जको जगरनाथपुर चोकमा १० कात्तिक विहान एक युवक मृत अवस्थामा फेला परेका छन् । शवको प्रकृति हेर्दा कुटेर हत्या गरिएको हुनसक्ने प्रहरीले बताएको छ ।

वीरगन्ज– २६ सबैठवा टोलका २० वर्षीय रामविनेश कुशवाहा मृत अवस्थामा फेला परेका हुन् । उनको घाँटी र छातीमा गहिरो चोट लागेको छ भने उनी चढेको मोटरसाइकल पनि तोडफोड भएको छ । शवको प्रकृति हेर्दा दुर्घटना नभई कुटपिट गरी हत्या गरेको हुन सक्ने प्रहरीको अनुमान छ ।

कुशवाहा बन्दका बेला मोटरसाइकलमा यात्रुहरुलाई ओसार्ने काममा संलग्न थिए । बन्दका बेला मोटरसाइकल चलाएको भन्दै उनी र आन्दोलनकारीबीच पहिले विवाद समेत भएको थियो ।

ना ३४ प ११२८ नम्बरको मोटरसाइकलमा सवार भई १० कात्तिक बिहान तीन बजे घरबाट निस्किएका थिए ।

सशस्त्र प्रहरी निरीक्षक मोहन देवकोटाले कुशवाहा मृत फेला परेको र उनको घाँटी र छातीमा कसैको आक्रमणबाट चोट लागेको डाम देखिएको बताए । शव पोष्टमार्टमका लागि नारायणी उपक्षेत्रीय अस्पतालमा लगिएको छ ।

घटनाबारे थप अनुसन्धान भैरहेको प्रहरी उपरीक्षक राजुबाबु श्रेष्ठले बताए ।

सुरेश बिडारी, वीरगञ्ज

प्रतिकृया दिनुहोस