तस्वीर: सुरेश विडारी

मधेशमा जारी बन्द–हडतालका कारण पर्साको सिर्सिया सुख्खा बन्दरगाहमा अर्बौंको मालसमान थन्किएको छ ।

रेल मार्ग हुँदै तेस्रो मुलुक र भारतबाट आयात गरिएका करिब रु १२ अर्बको मालसामान एक महिना भन्दा लामो समयदेखि सिर्सिया ड्राइपोर्टमै थन्किएको ड्राइपोर्ट भन्सार कार्यालयका निमित्त प्रमुख हरिहर प्रसाद पौडेले जानकारी दिए ।

उनले भने, “ड्राइपोर्टमा झण्डै १२ अर्ब मूल्य बराबरको एक लाख १३ हजार मेट्रिक टन सामान थन्किएको छ ।”

फलाम ८२ हजार मेट्रिक टन, रासायनिक मल ३० हजार मेट्रिक टन (६ लाख ५९ हजार ६४० बोरा ), मकै दुइ हजार ५०० मेट्रिक टन थन्किएको छ ।

यस्तै विदेशी मदिरा, काठका फर्निचर, कपडाका कच्चा पदार्थ, भटमासको पिना, विद्युतीय सामाग्रीहरु पनि ड्राइपोर्टमै अलपत्र छन् ।

ढुवानी हुन नसकेका कारण भन्सारमा रहेका दुई वटा ठूला र तीन वटा साना गोदाम समानले भरिभराउ छन् भने गोदाममा नअटेपछि फलाम, रासायनिक मल र मकैका बोराहरु ड्राइपोर्ट परिसर भित्रकै खुल्ला स्थानमा चाङ लगाएर राखिएका छन् ।

त्यस्तै माल समान लिएर आएका एक हजार भन्दा बढी कन्टेनर ड्राइपोर्ट परिसरमै रोकिएका छन् । मधेशमा जारी हड्ताल र नकाबन्दीका कारण ढुवानी ठप्प भएकोले तेश्रो मुलुक तथा भारतबाट आयात गरिएका मालसामान सहितका १ हजार ७३ वटा कन्टेनर थन्किएर बसेको भन्सार कार्यालयले जनाएको छ ।

कार्यालयका अनुसार तेस्रो मुलुकबाट नेपालका लागि समान लिएर आएका ६ सय वटा कन्टेनर भारतको कोलकाता बन्दरगाहामा व्यापारीहरुकै आग्रहमा रोकिएका छन् ।

सिमाङ्कन लगायत विविध विषयमा असन्तुष्टी जनाउँदै आन्दोलनमा रहेका मधेशकेन्द्रित दलले ३० साउनदेखि अनिश्चितकालीन आम हडताल र ७ असोजदेखि वीरगन्ज रक्सौल नाकाको दशगजा क्षेत्रमा २४ अ‍ै घण्टा धर्ना दिएर नाका ठप्प पार्दै आएका छन् ।

बन्द हडतालका अवधीमा स्थानीय प्रशासनले निशेधाज्ञा र कफ्र्यु लगाएरै भएपनि रातिको समयमा सुरक्षा दिएर मालसामान विभिन्न गन्तव्यमा पठाएको भएपनि पछिल्लो समयमा स्कर्टिङ गर्न छोडेको छ ।
सुरेश बिडारी, वीरगञ्ज

प्रतिकृया दिनुहोस