नेपाल परिवार दलका दयाराम कँडेल र स्वतन्त्र सांसद अतहर कमाल मुसलमानले उम्मेद्‌वारी फिर्ता लिएपछि सत्तारुढ गठबन्धनका नन्दकिशोर पुन र नेपाली कांग्रेसका अमियकुमार यादवबीच उपराष्ट्रपति पदमा प्रतिश्पर्धा हुने भएको छ ।

स्वतन्त्र सांसद मुसलमानले कांग्रेसका उमेद्वार यादव र कँडेलले गठबन्धनका उम्मेद्‌वार पुनलाई समर्थन जनाउँदै उम्मेद्‌वारी फिर्ता लिएका छन् । दुई जनाले उम्मेद्‌वारी फिर्ता लिएपछि १४ कात्तिक विहान ११ बजेबाट पुन र यादवबीच चुनावी प्रतिश्पर्धा हुनेछ ।

यादवको प्रस्तावकमा कांग्रेसका मुख्य सचेतक चीनकाजी श्रेष्ठ र समर्थकमा ईश्वरी न्यौपाने छन् भने पुनको प्रस्तावकमा एमाले वरिष्ठ नेता झलनाथ खनाल र समर्थकमा राप्रपा नेपालका प्रमुख सचेतक दिलनाथ गिरी छन् ।

संसदको अन्तरिम कार्यविधि, २०७२ को दफा ३३ को उपदफा २ बमोजिम उपराष्ट्रपति पदमा बहुमतीय प्रणाली अनुसार निर्वाचन हुँदैछ । विहान ११ बजेदेखि २ बजेसम्म हुने मतदानको नतिजा साँझ ५ बजे सार्वजनिक हुने संसद् सचिवालय अन्तर्गतको निर्वाचन समितिले कार्यतालिका सार्वजनिक गरेको छ ।

प्रधानमन्त्री निर्वाचनमा नेपाली कांग्रेसका सभापति सुशील कोइराला र नेकपा एमालेका अध्यक्ष केपी शर्मा ओलीबीच उमेद्वारी परेदेखि प्रमुख दलहरु विभाजित भएपछि महत्वपूर्ण राजनीतिक पदहरुमा सहमति जु्ट्न सकेको छैन । प्रधानमन्त्री निर्वाचनका बेला ओलीलाई सघाउने गठबन्धन र नेपाली कांग्रेसबीच यसअघि प्रधानमन्त्री र राष्ट्रपति निर्वाचनमा प्रतिश्पर्धा भइसकेको छ ।

सत्तारुढ गठबन्धनमा १४ दल छन् भने प्रधानमन्त्री निर्वाचनमा मधेश केन्द्रित दलहरुको समर्थन पाएको नेपाली कांग्रेसले राष्ट्रपति र उपराष्ट्रपति निर्वाचनमा एक्लै उम्मेद्‌वारी दिएको छ । कांग्रेसको उमेद्वारी दर्ता नभएपछि सभामुख र उपसभामुख भने निर्विरोध निर्वाचित भएका थिए ।

संसदमा २०७ सांसद रहेको कांग्रेसका राष्ट्रपति उम्मेद्‌वार कुलबहादुर गुरुङले २१४ मत पाएका थिए भने प्रधानमन्त्रीमा ओलीले पाएको मत राष्ट्रपतिमा विद्यादेवी भण्डारीले कायम राख्न सकेका थिइनन् । प्रधानमन्त्रीमा ओलीले ३३८ मत पाएकोमा राष्ट्रपतिमा भण्डारीले ३२७ मत मात्रै पाएका थिए ।

तर, सत्तारुढ गठबन्धनले उपराष्ट्रपतिमा पुनलाई साझा उम्मेद्‌वार बनाउने १३ कात्तिक विहान बसेको उच्च स्तरीय राजनीतिक समन्वय समितिबाट निर्णय भएपछि लगभग पुन उपराष्ट्रपति निर्वाचित हुने सुनिश्चित देखिन्छ । कांग्रेसका पक्षमा स्वतन्त्र सांसदले उम्मेद्‌वारी फिर्ता लिदै समर्थन जनाउने निर्णय लिएपनि अरु दलहरुले कुनै निर्णय लिएको छैन ।

प्रधानमन्त्रीको निर्वाचनमा मतदान गर्न आएका मधेश केन्द्रित दलका ४८ सांसदहरु उपराष्ट्रपति निर्वाचनमा आउने संभावना देखिदैन ।

-कपिल भट्ट, काठमाडौं

प्रतिकृया दिनुहोस