उपराष्ट्रपति पदका लागि आज १४ कात्तिकमा भएको निर्वाचनमा एमाओवादीका नन्दबहादुर पुन निर्वाचित भएका छन् ।

व्यवस्थापिका संसद भवन नयाँ बानेश्वरमा भएको निर्वाचनमा पुनले ३२५ मत प्राप्त गरेका छन् ।

त्यसैगरी पुनका प्रतिस्पर्धी नेपाली कांग्रेसका अमियकुमार यादवले २१२ मत प्राप्त गरेका छन् । कुल ५४७ मत खसेकोमा १० मत बदर भएको छ ।

गणतन्त्र नेपालको दोस्रो उपराष्ट्रपतिको जिम्मेवारी पाएका पुन माओवादी लडाकुका पूर्व कमाण्डर हुन् ।

पुन मंसीर २०७० मा भएको संविधानसभा सदस्य निर्वाचनमा काठमाडौं क्षेत्र नम्बर ४ मा पराजित भएका थिए । उक्त क्षेत्रबाट कांग्रेसका गगन थापा निर्वाचित भएका थिए भने दोस्रोमा एमालेका निर्मल कुइँकेल र तेस्रोमा पुन थिए ।

पुनको उम्मेदवारीबारेमा सत्ता साझेदार दलहरुबीच विवाद भए पनि एमाओवादीले अडान नछोडेपछि अन्तत्वगत्वा उनैलाई उपराष्ट्रपतिको साझा उम्मेदवार बनाइएको थियो ।

नन्दकिशोर र पासाङ उपनामले समेत चिनिने पुनको नागरिकताको नाम नन्दबहादुर पुन भएको स‌ंसद सचिवालयले जनाएको छ ।

प्रतिकृया दिनुहोस