थप समाचारसोमबार, कार्तिक १६, २०७२

प्रहरीसँगको झडपमा गोली लागेर मृत्यु भएका नागरिक भारतीय भएको पुष्टि

हिमालखबर

वीरगञ्जको शंकराचार्य गेटमा प्रहरीसँगको झडपमा गोली लागेर मृत्यु भएका व्यक्ति भारतीय भएको पुष्टि भएको छ ।

प्रहरीका प्रमुख एसपी राजुबाबु श्रेष्ठका अनुसार रक्सौल नयाँ रोडका भारतीय नागरिकको गोली लागेर मृत्यु भएको हो । मृतकको नाम भने एकिन हुन सकेको छैन ।

मृतकको शवमा भेटिएको प्रमाणमा विभिन्न नाम उल्लेख भएकाले नाम पहिचान हुन नसकेको एसपी श्रेष्ठले बताए । एसपी श्रेष्ठले भने, “अमित, आशिष र सोनु नाम उल्लेख प्रमाणहरु भेटिएकाले नाम एकिन हुन सकेको छैन ।”

ती नागरिक आन्दोलनमा संलग्न हुँदै प्रहरमाथि ढुंगामुढा गर्दै अघि बढ्ने क्रममा प्रहरीको गोली लागेको जनाइएको छ । गृहमन्त्रालयका प्रवक्ता लक्ष्मी ढकालले यसबारे केही समयपछि गृहमन्त्रालयले विज्ञप्ती जारी गर्ने जनाए ।

उनले हिमालखबरसँग भने, “अहिले बैठक चलिरहेको छ, केही समयपछि विज्ञप्ती जारी गरेर यसबारे प्रष्ट पार्छाै ।” रक्सौल नाका प्रहरीले विहान खुलाएपछि वीरगञ्ज तनावपूर्ण बन्दै आएको छ । विभिन्न ठाउँमा आन्दोलनकारी र प्रहरीबीच झडप भइरहेको छ ।

अवस्था नियन्त्रण बाहिर जान थालेपछि स्थानीय प्रशासनले दिउँसो ३ बजेबाट कर्फ्यू जारी गरेको छ ।

-राजु श्रेष्ठ, बीरगञ्ज

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...