स्थानीय प्रशासनले जारी गरेको कर्फ्यू उल्लङ्घन गर्दै वीरगञ्जमा संयुक्त लोकतान्त्रिक मधेशी मोर्चाका कार्यकर्ताले विहानैदेखि प्रदर्शन जारी राखेका छन् ।

प्रदर्शनका क्रममा प्रहरीसँग विभिन्न ठाउँमा झडप समेत भएको छ । नगवा र ब्रम्ह चोकमा प्रहरी र प्रदर्शनकारीबीच झडप भएको हो ।

बाइपास सडकको नगवा चोकमा बिहान मोर्चाका कार्यकर्ताले सडकमा टायर बालेर प्रदर्शन गर्ने क्रममा प्रहरीले अवरोध गरेपछि स्थिति तनावपूर्ण बनेको थियो ।

झडपका क्रममा प्रहरीले प्रदर्शनकारीको भिडलाई तितरवितर पार्न २० राउण्ड भन्दा बढी हवाइ फायर गरेको प्रत्यक्षदर्शीहरुले बताएका छन् ।

यस्तै, बाइपास सडककै ब्रम्हचोकमा प्रदर्शनकारी र प्रहरीबीच झडप भएको छ । प्रदर्शनकारीले सडक छेउमा राखेको दुई वटा साइकल प्रहरीले जल्दै गरेको टायरमा हालेपछि आन्दोलनकारी आक्रोसित भएर प्रहरी माथि ढुङ्गा हान्न थालेका थिए ।

-सुरेश बिडारी, वीरगञ्ज

प्रतिकृया दिनुहोस