नेपाल आयल निगमले चिनियाँ पेट्रोलियम कम्पनी पेट्रो चाइनासँग पेट्रोलियम पदार्थको मूल्यसूची उपलब्ध गराउन आग्रह गरेको छ ।

निगमका कार्यकारी निर्देशक गोपालबहादुर खड्काले आज, १७ कात्तिकमा पेट्रो चाइनालाई एक पत्र पठाएर व्यवसायिक कारोबारका लागि इन्धनको मूल्यसूची उपलब्ध गराउन आग्रह गरेको जानकारी दिए ।

उनले चीनबाट पेट्रोलियम पदार्थ आयात गर्न सकिन्छ भन्ने प्रमाणित भएपछि थप प्रक्रिया अगाडि बढाउन लागिएको बताए ।

केरुङ नाकाबाट चीनले उपलब्ध गराएको पेट्रोल आयात गर्न नेपाली ट्याङ्कर आज पनि त्यसतर्फ लागेका छन् ।
आज १२ वटा ट्याङकर केरुङ्तर्फ लागेको निगमले जनाएको छ ।

भारतले नाकाबन्दी गरेपछि वैकल्पिक स्रोतको खोजीमा लागेको निगमले चीनबाट अनुदानमा प्राप्त १३ लाख लिटर पेट्रोल ल्याउन थालेको छ ।

चीनबाट ल्याइएको पेट्रोल निगमको थानकोटको भण्डारण डिपोमा भण्डारण गरिएको छ ।

चीनका लागि नेपाली राजदूत महेशमान मास्के नेतृत्वको टोलीले केहीदिन पहिले पेट्रो चाइनासँग इन्धन आयात गर्ने सम्बन्धमा द्विपक्षीय सम्झौता गरेको थियो ।

चीनबाट निगमले कुल खपतको ३३ प्रतिशत इन्धन आयात गर्ने सम्झौता गरेको थियो ।

सो सम्झौता भएपछि निगमलाई चीनले अनुदानस्वरुप १३ लाख लिटर इन्धन अनुदानमा उपलब्ध गराएको थियो ।

प्रतिकृया दिनुहोस