पूर्वीनाका काँकडभिट्टा भएर नेपाल प्रवेश गर्ने अनुमति पर्खिरहेका इन्धन बोकेका तीसवटा ट्याङ्करसहित ५०० भन्दा बढी नेपाली मालबाहक गाडी भारतीय नाका पानीट्याङ्कीमा अलपत्र परेका छन् ।

भारतीय नाकामा भन्सार प्रशासनले सुरक्षा निकायको निर्देशन बिना गाडी पास गराउन नसक्ने बताउँदै आएको छ ।

मेची पेट्रोलियम डिलर्स एसोसिएसनका अध्यक्ष लय भण्डारीले पर्याप्त तेल आउन नपाउँदा इन्धन समस्या झन् जटिल बन्न थालेको बताएका छन् । उनका अनुसार हिजो काँकडभिट्टा नाकाबाट एक टयांकर हवाई इन्धन र एउटा ग्यासको बुलेट मात्र भित्रिएको थियो ।

पेट्रोल र डिजेल बोकेका गाडीलाई भारतीय सुरक्षाकर्मीले चेकजाँच गर्नुपर्ने बहानामा रोकिराखेका छन् ।

वीरगन्जमा प्रहरीसँगको झडपमा भारतीय नागरिक मारिएको घटनापछि पूर्वी नाकामा भारतीय सुरक्षाकर्मीले माथिको आदेश भन्दै नेपाली गाडीलाई प्रवेश अनुमति नदिएको हो ।

काँकडभिट्टा इलाका प्रहरी कार्यालयका प्रहरी नायब उपरिक्षक श्याम अधिकारीले भारतको पानीट्याङ्की नाकाबाट तीन दिनदेखि गाडी आउने क्रम कम हुँदै गएको बताए ।

पानीट्याङ्की नाकादेखि भारतको अर्को बजार नक्सलबाडीसम्म नेपाली गाडी राजमार्गमा लाम लागेका छन् । त्यस क्रममा नेपाली सामान र चालकको असुरक्षा बढेको ढुवानी व्यवसायी बताउँछन् ।

प्रतिकृया दिनुहोस