रक्सौलबाहेकका नाकाबाट सीमित मात्रामा मालबाहक गाडी नेपाल आउन दिएको भारतले १६ कात्तिकपछि नाकामा झन् कडाई गरेको छ ।

देशका अन्य नाका भन्दा खुकुलो रहेको नेपालगन्ज–रुपैडिया नाका पछिल्लो समयमा भारतले कडा पारेको छ ।

१८ कार्तिक बिहानैदेखि भारतले रुपैडिहाबाट कुनै पनि मालबाहक गाडी नेपालतर्फ आउन दिएन ।

‘माथिको आदेश’ भन्दै भारतीय सशस्त्र सीमा बल (एसएसबी) ले भन्सार क्लियरेन्स भैसकेका गाडीहरु पनि रोकिरहेको छ । १६ कात्तिकमा मानिसको आवागमन समेत रोकेको भारतले १७ कात्तिक विहान भने इन्धन बाहेकका सिमित मालवाहक गाडी नेपालतर्फ आउन दिएको थियो ।

अहिले सीमापारी ५ वटा डिजल, ग्याँस २ बुलेट र अन्य मालबाहक गाडीहरु गरी जम्मा ११३ वटा गाडी नेपालमा आउन लाइनमा रहेको जमुनहा प्रहरीले जानकारी दिएको छ ।
केशव राना, बाँके
——————————————————————————–

पानीटंकीमा ६०० गाडी अलपत्र
दुई दिनदेखि नेपाल आउन पालो पर्खिरहेका १८ वटा इन्धनका ट्यांकरलाई एसएसबीले पानीटंकीमा रोकिराखेको छ ।

१८ कात्तिकमा नाकाबाट आएका ४३ मालबाहक गाडी भित्रिए पनि इन्धनको एउटा पनि नरहेकोे मेची भन्सार काँकडभिट्टाका अधिकृत निर्माण भट्टराईले बताए ।

इण्डियन आयल कर्पाेरेसनले बोलाएर १६ कात्तिकमा न्युजलपाईगढी डिपो पुगेका १९ ट्यांकर मध्ये १७ कात्तिकमा एउटा हवाई इन्धनको ट्यांकर मात्र तेल भरेर नेपाल छिरेको थियो । रोकिएका १८ ट्यांकरमा १३ वटा डिजेलका र पाँचवटा पेट्रोलका छन् ।

१७ कात्तिक बिहान बिरगञ्ज—रक्सौल नाकामा एकजना भारतीय प्रदर्शनकारीको ज्यान गएपछि पानीटंकीमा भारतिय पक्षले थप कडाई गरेको काँकडभिट्टास्थित नेपाली अधिकारीहरुले बताएका छन् ।

अहिले उक्त नाकाबाट नेपाल भित्रिन कम्तीमा ६ सय मालबाहक गाडी पालो कुरीरहेका छन् ।
गोपाल गडतौला, झापा

प्रतिकृया दिनुहोस