खेलकुदशुक्रबार, कार्तिक २०, २०७२

डेभिड बेकह्यामले भक्तपुरमा फुटबल खेले (तस्वीरहरु)

हिमालखबर

चर्चित बेलायती फुटबल खेलाडी डेभिड बेकह्याम नेपाल आएर भक्तपुरका बालबालिकासँग टेबुल टेनिस र फुटबल खेलेका छन् ।

त्रिभुवन अन्तर्राष्ट्रिय विमानस्थलमा डेभिड बेकह्याम । तस्वीर: गोपेन राई/हिमालखबर

काठमाडौं विमानस्थलमा उत्रिएपछि उनी सोझै भक्तपुर सल्लाघारी पुगे । सल्लाघारीबाट टेम्पोमा चढेर दरबार क्षेत्रमा रहेको पद्म उच्च मावि गएका बेकह्यामले त्यहाँका बालबालिकासँग केही बेर टेबुल टेनिस पनि खेले ।

भक्तपुर न्यातपोल मन्दिर परिषरमा बेकह्याम । तस्वीर: गोपेन राई/हिमालखबर

भूकम्पबाट क्षति पुगेका घरहरुको समेत अवलोकन गरेका बेकह्याम न्यातपोल मन्दिर परिषरको इँटा छापेको आँगनमा करिब २० मिनेटजति बालबालिकासँग फुटबल खेले ।

बेकह्यामलाई उनी खेल्ने गरेको क्लब म्यानचेस्टर युनाइटेडको झण्डा देखाएर स्वागत गर्दै प्रशंसक । तस्वीर: गोपेन राई/ हिमालखबर

२० कात्तिक विहान साढे ११ बजे चार्टर फ्लाइटबाट काठमाडौं आइपुगेका बेकह्याम सात महादेशमा सात वटा फुटबल खेलमा सहभागी हुने योजना अन्तर्गत काठमाडौं आइपुगेका हुन् ।

तस्वीर: गोपेन राई/ हिमालखबर

युनिसेफका सद्भावना दूत समेत रहेका बेकह्याम ‘बालिका सशक्तिकरणका लागि फुटबल’ भन्ने युनिसेफको कार्यक्रम अन्तर्गत नेपाल आएका हुन् जसको छायाँकन गरेर बीबीसीले डकुमेन्ट्री समेत बनाउँदैछ ।