दाङमा भारतीय नम्वर प्लेटको ट्रकमा आगो लागेको छ ।

दाङको घोराहीमा केरा झारेर फर्किदै गरेको युपी ५५ सी ४०२५ नम्वरको ट्रकमा ४/५ जनाको अपरिचित समूहले आगजनी गरेको चालक सुकदेव यादवले दाबी गरे पनि घटनाबारे बुझ्दा कुनै समूहले आगो लगाएको नभई अरु नै कारणबाट आगो लागेको हुनसक्ने अनुमान गरेको छ ।

भारतको कृष्णनगरबाट केरा लिएर आएको ट्रक फर्किने क्रममा घोराही–लमही सडक खण्डको चौपट्टामा रोकेर सो समूहले आगजनी गरेको चालक यादवले बताए ।

आगो लागेर ट्रक ध्वस्त भएको दाङका प्रहरी प्रमुख कुबेर कडायतले जानकारी दिए ।

प्रहरीले ट्रकको अघिल्लो भाग र चक्का जलेको र घटनाको प्रकृति हेर्दा ट्रकको इन्जिनमै समस्या आएर आगो लागेको हुनसक्ने अनुमान गरेको छ । “घटना हेर्दा अरु कसैले आगो लगाएजस्तो देखिंदैन,” दाङका प्रहरी प्रमुख कुबेर कडायतले बताए ।

ट्रकमा आगलागी भएको जानकारी पाए लगत्तै घोराही नगरपालिकाबाट गएको दमकलले आगो नियन्त्रणमा लिएको थियो ।

ट्रकमा एक जना नेपाली चढेको र आगलागी भएपछि अर्को गाडीमा चढेर गएको सूचना पाएपछि प्रहरीले बास्तविकता पत्ता लगाउन खोजी कार्य तीब्र बनाएको जनाएको छ ।
देविका घर्ती मगर, दाङ

प्रतिकृया दिनुहोस