सई कृष्णप्रसाद बस्नेत

इलाका प्रहरी कार्यालय जीतपुर, बाराका सई कृष्णप्रसाद बस्नेतले घडी हराएको निहुँमा सर्वसाधारणलाई धम्की दिई रु. ३० हजार असुलेको पीडितले बताएका छन् ।

गत शनिवार, २८ कात्तिक बिहान इलाका प्रहरी कार्यालय जीतपुर नजिकै दुई स्थानीय बीच भएको झगडा छुट्ट्याउन पुगेका प्रहरी नायव निरीक्षक (सई) ले लगाएको घडी हराएको र उक्त घडी ल्याएर नदिए थुनिदिने धम्की दिंदै रकम माग गरेको पीडितहरुले बताए ।

प्रहरीको थुनिदिने धम्कीपछि झगडिया दुबै पक्ष मिलेर सई बस्नेतलाई ३० हजार रुपैयाँ दिएको प्रत्यक्षदर्शी जीतपुरका रमेश रामले बताए ।

स्थानीय मोतिलाल सहनी र शम्भु कलवारबीच काम गरेको रकमलाई लिएर झगडा भइरहेका बेला छुट्टयाउन पुगेका बस्नेतको घडी हराएको बस्नेतले बताएका छन् ।

प्रत्यक्षदर्शी रामका अनुसार बस्नेतले आफ्ने घडी नल्याइदिए झगडिया लगायत घटनास्थलमा रहेका सबैलाई थुन्ने धम्की दिंदै एकजनालाई पक्राउ गरी जीतपुर चौकीमा राखेका थिए ।

पक्राउ परेकालाई छुटाउन प्रहरी कार्यालयमा पुगेकाहरुसँग जीतपुरका एक ब्यापारीले बस्नेतको घडी रु एक लाख मूल्यमा अमेरिकाबाट ल्याइएको भन्दै एक लाख नै जरिवाना तिराउनु पर्ने बताएका थिए ।

तर, स्थानीयले आफूहरुले तीसहजार भन्दा बढी रकम जुटाउन नसक्ने बताएपछि बस्नेतले रु. ३० हजार लिएर पक्राउ परेकालाई छोडेको रामले बताए ।
पीड्ति शम्भु कलवारकी काकीले छठ पर्वको किनमेलका लागि जम्मा गरेको रकम प्रहरीमा बुझाउनु परेको भन्दै गुनासो गरिन् ।

पीड्ति मोतिलाल साहनीले सई बस्नेतले घडी लगाएको समेत आफूले नदेखेको तर, अनाहकमा रकम तिर्नु परेको बताए ।

यता सई बस्नेतले भने आफुले रकम लिएको अस्वीकार गरेका छन् ।

बस्नेतले आफ्नो हराएको घडी अमूल्य भए पनि आफूले कसैबाट एक रुपैयाँ समेत नलिएको दाबी गरे ।
श्याम गुप्ता, बारा

प्रतिकृया दिनुहोस