आइसिसी विश्व क्रिकेट लिग च्याम्पियनसिपअन्तर्गत अवुधाबीमा जारी खेलमा नेपालले पपुवा न्यूगिनीलाई २३३ रनको लक्ष्य दिएको छ ।

टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २३२ रन बनाएको हो ।

यूएईको अबुधावीमा भइरहेको दोस्रो चरणको पहिलो खेलमा ओपनिङ ब्याट्सम्यान अनिल मण्डल पहिलो बलमै एलबीडब्लूको शिकार बने । सागर पुन २३ बलमा २ चौका मद्दतले १० रन र ज्ञानेन्द्र मल्ल २६ बलमा २३ रन जोडेर एलबीडब्लू आउट भए ।

शरद भेषवाकरले ७८, सुवास खकुरेलले ६३ र बसन्तले २४ रन बनाए । कप्तान पारस खड्का १६ बलमा ६ रन बनाएर आउट भए ।

सोमपाल कामीले ८ र मेहबुब आलम ३ रन मात्र बनाए भने शक्ति गौचन १ रनमा अविजित रहे ।

नेपाललाई आजको खेल जित्नैपर्ने वाध्यता छ । च्याम्पियनसिप अन्तरगतका पहिलो चरणका स्कटल्यान्डसँगका दुवै खेलमा पराजित नेपाललाई जितको दबाब छ ।

अर्कोतर्फ पहिलो चरणका आफ्ना दुवै खेल गुमाएकाले पपुवा न्यूगिनीलाई पनि उस्तै दबाब छ ।